Kachin State, Mogaung Township, Nanmati khua kiangih loram sungah ṭek a tla, loram sungih um thlam cu ṭek in a tlak ih thlam hnuai ih riak caw 24 an thi thluh.
A hlan ahcun caw pawl ih tlanglo ah an khal ṭheu, asinan tulai hi hanghnah hangrah cing an tam ruangah caw pawl cu Kyaw Htaung loram sungah an riahter, caw 24 neitu pawl cu innsang 9 an si. July 8, 2022 zan (zingpit) nazi 3:00 hrawngah ṭek ih caw 24 cu a tla that.
Caw neitu pakhat in, “Himi zan ah ruah le thlipi nasa zetin a hrang ciamco, ṭek khal a tla rero. Caw pawl an itthat laiah ṭek in a tlak that thluh, thlam khal a siat. A thaisun ah caw thi pawl cu kan vuiliam thluh” a ti.
Thudang: Kalaymyo, SaeGyi Tiva Ah Mithi Ruak (2) An Hmu
Kalaymyo, SaeGyi khua kiang SaeGyi tiva ah mithi ruak (2) an hmu, mithi pahnih cu TaPhanEin khuami nufa an si ih July 9 ah thicia in an va hmu. Mual liamtu pahnih cu PyinTawU khua ah zingtinten arsa an va zuar ṭheu.
Mithi ruak pahnih parah meithal kahnak hliamhma pahnih veve aum, mipa sawn ih lu ah nam ih satnak hliamhma nasa zet aum. Mual liamtu pahnih cu mipa kum 20 hrawng mi le hringtu a nu kum 50 hrawng mi an si.
Mibawmtu pawlkom in, “Zanlam nazi 5:00 hrawngah phone thawn in sim thei. Hmun dangah that an ton ih hitawk hmun ah an ra hlon a bang, mizan ah siizung ah kan ret ih zohdiknak an nei. Tuizing ah an vuiliam, an ruak kiangah arsa le thilri bungrua pawl aum. Nam khal aum, an paisa bawm sung khalah sumpai aum lai. Tualthattu in sumpai an laksak lo, ziangruangah an that ti cu kan thei hrih lo” a ti.
Leave a Reply