Ṭio (Khawmawi) khua kiangih um ralhrang sakhan cu mipi ralkap tangtlang pawlin August 10, 2022 zingpit ah drone hmangin an va kap. Ralbawi telin ralhrang 5 an thi ih hliamtuar khal tam zet an um, ralhrang pawlin ralthuam picang an kap ciamco ruangah khuasung mi pakhat a thi ih hliamtuar khal an um.
Inn 5 an siatsuat. Hualngoram-CDF in himi thuhla ah an lungawi lonak an tarlang ih cangvaitu pawl cu ralrinnak an pe. Abik takin New Haimual khua ih umhmun khuar mipi ralkap Mountain Eagle Defence Force (MEDF) pawl cu an mawhthluk.
Hualngoram-CDF in ralhrang sakhan la tum si loin an va kap hrim ruangah khuasung mi pakhat a thi ih hliamtuar an um. Mipi pawl mangbang thlaphang dingin an tuah.
Neta ahcun Hualngoram-CDF theihpinak tello in mipi thlaphang dingih cangvaitu pawl cu ralkap thazang hmang in thungrul sal an si ding, an parah ziangthil khal a thleng asilen anmai tuahsuak mi a si’ tin ralrinnak an pe.
Cumi hnuah ZFU/PDF-Zoland le CNO/CNDF khalin Hualngoram-CDF cu ralrinnak an pe ve cih. Falam pengsung ah hriamkai pawlkom dang um lo dingin theihternak an rak suah zo thu an tarlang.
Hualngoram-CDF in khualtlawng pawl hnenah sumpai an rak dil ṭheu ih mipi thlaphang dingin an tuah. Neta ah mipi thlaphang dingih cangvaitu pawl cu a ṭuldan vekin kan thungrul sal ding” an ti.
Leave a Reply