Ṭio Tiva Kap Ih Leithanel La Pacang Cu Savom In A Keu That

Lungkawlh Presbyterian Kawhhran Upa R.Chhunthangvunga (kum 54) cu March 1, 2022 ah Ṭio tiva kap ah savom fa nei pekte in a keu that. Pu R.Chhunthangvunga le a nupi Pi Biakkheni in fa 4 an nei zo ih mipa 3 le nunau 1 an si.

An fapa upabik in nupi anei zo ih inndang an tlei, midang cu tlawngkai lai an si. A nulepa tei inn cu an sak rero lai ruangah a nulepa in an va fin. A nulepa tei inn saknak ding leithanal cu a fapa kum 14 mi Rozama thawn riak in Ṭio tiva kap ah an va la, Ṭio tiva kap ah midang leithanel la ih riak an rak um hnuaihni.

Mizan ah Ṭio kap ih leithanel la ṭheu truck nei pawlin nuamawknak le rawlei khawmnak an tawlrel ih an pafa in rawlei an rak sawm ve. Nidang aiin zanriah an ei tuan deuh. Rawl an khawh hnu, khawthim zik nazi 6:30 hrawngah Pu R.Chhunthangvunga cu rawlhmeh hawl dingin a suak ih savom nau nei pekte thawn an tongaw thutthi ih a soisa that.

Ṭio tiva kap ih riak pawlin savom thawmvang an rak thei ih an ngaih a ṭha lo. Savom thawmvang a reh hnuah an vung kuk rero nan letsawngtu aum lo. Ngaih ṭha lo zet cingin savom thawmvang umnak lamah an va feh ih Pu Chhuna an hmuh tikah cun arak thifel zo.

Ruak hmutu pawlin savom in a keunak ah hliamhma nasa zet a tuar, a thahripi a keucat ih a thisen suak tamtuk ruangah a thi si ding an ti. Ruak umnak kiangte ah savom fate 2 an hmu ih a pi cu arak um lo, savom fate cu buaipi man loin an fehsan. Pu R. Chhunthangvunga ruak umnak hi ram rem lo zet a si ruangah ruak lak khalah an buai zet, Ṭio tiva kap ah ruak cu an la ih an riahnak buk pawl an ti fel.

Khua ihsin mi tlawmngai pawl an va thlen hnuah ruak cu khua lamah an phur. Ṭio ihsin Lungkawlh khua hi km 9 hrawngin a hla, lamzin khal a sia zet. Ruak cu mizan an menpi hnu tuizing nazi 9:00 hrawngah Vanlaiphai siizung ah postmortem tuah dingin an phur, postmortem tuah hnuah an vuiliam ding. (#Mizo Special Report)

Be the first to comment

Leave a Reply

Your email address will not be published.


*