2020 Hrilawknak Ih Official Pakhat Cu Ralkap In An Vel That, A Hnakruh A Kiak

Myanmar ralkap pawlin 2020 kum hrilawknak ah vote diklo aum tin an rak cohlang lo ih ramsung thuneihnak cu NLD kutsung ta an lonsak. Cutin, NLD hruaitu upa pawl cu an kai vivo ih ṭhenkhat cu an that, ṭhenkhat cu hmundang ah sahimnak hawl in an rak tlanhlo.

April thla ah Pathein ih UEC secretary Tin Maung San an kai ih an hrem that, a thaizing ah a innsang pawl hnenah a ruang ra la uh an ti. A thihnak cu step ihsin a tla ih a thi an ti, asinan a taksa parah hliamhma nazet an hmu ih a hnakruh 7 khal a kiak.

May 19, 2021 khalah Magway, Union Election Commission (UEC) official kum 47 mi Khin Maung Kyi cu an kai ih an hrem that. Khin Maung Kyi cu kai dingih an hawl rero mi a si ih ramlakah caan reipi sung arak relh zo, asinan ruah a sur ih thli a hrang nasa tuk ruangah a thupten an inn ah ava tlung lawk.

Cutin, an lo kiangah khuasung minung 5 thawn an relh phah ih lo hna an ṭuan ṭheu. Lo hnaṭuan lo cun ei le in kan harsa ding an ti ruangah vainim an cin ih an kilkhawi, lo thlam sungih an um lai cu ralkap lamtang dalan in an rak hmu ih ralkap hnenah an sim thei.

May 19 zanah ralkap pawlin thlam sungih um minung 6 cu an va kai ih an hrem nasa tuk ruangah Khin Maung Kyi cu a thi, a hnakruh khal a kiak ih a taksa zaten a thling thluh. A innsang pawlin a ruang cu an la zo ih a zanlam ah an vuiliam hngal, an kaihmi midang 5 ih thuhla khal khuasung mipi pawlin an thei nawn lo.

Be the first to comment

Leave a Reply

Your email address will not be published.


*