A Bike Mawng Lai Check Dingin An Rak Dingter Ih A Ding Lo Ruangah Ralkap Motor Thawn An Pah/Rial That, 2017 Myanmar Prince Ngahtu A Si

May 28 zan nazi 9:00 hrawngah tlangval kum 20 mi Ko Htet Aung in bike a mawng. Yangon, Insein Township, Pauktawwa lamzin ah bike a mawng ih ralkap pawlin an rak dingter, check dingin an dingter ih cawl loin a feh lan ruangah ralkap motor thawn an dum ih an pah/rial that.

Vengsung mithmutu in “Zan nazi 9:00 hrawngah an rak dingter ih a ding lo ruangah an dum ih a dunglam ihsin an pah. A bike khal lak ding aum nawn lo, a sia thluh. Bike mawngtu mino khal zianghman a thei nawn lo hngal, dinhmun sia zet ihsin a thi” a ti.

An sungkhat nunau pakhat in “Sualnak nei lo mipi pawl rapthlak zetzet in an that. Kum 20 mi mino te cu ziangtin khal nungdam in nan kai thei ringring, a thih hlan lo motor ih pah a ṭullo. Sualnak khal anei lo, san le vang um loin mi an that rero cu ziangtin himi ramah kan um vivo thei ding. Ziangtin lengah suak in hna kan ṭuan ngam ding” a ti.

Khit Thit Media in thilthleng dan pawl theifiang dingin phone thawn Insein palik sakhan an phone ih palik in ‘Lo sim dingin ṭuanvo kan nei lo, nan thei duh asilen sakhan ah ra uh” tin phone a thlak.

An pah thatmi Ko Htet Aung cu Stars & Models Int’l Yangon ihsin zirsuak a si ih model ṭuan lai a si. Mister Global Teen Myanmar 2017 Winner le Prince & Princess International Myanmar 2017 zuamawknak ah Winner laksawng ngahtu a si.

Be the first to comment

Leave a Reply

Your email address will not be published.


*