UK, Watton khua ih um tlangval Bamber in a duhdawt zet mi a fala cu June 15 sun ah neihawk a sawm tum ih a cangsual. A fala thawn kum 5 sung an rak kopaw zo. Norfolk lake tili kap ah ava fehpi ih neihawk sawmnak in a surprise tum, camera khal arak ret thup cia.
A fala cu neihawk a sawm ih zungbun a phorh zawn ah box sung ihsin zungbun cu a tla sual ih tili sungah a tla. A fala in ziang a cang a tiih zungbun a thlau thu a sim thei veten a fala cu a mit a meng ngam nawn lo, a kut pahnih in a mit a hup. Zungbun cu £999 man a si.
An rualpi pawl an va tlan hngal ih tili sungah zungbun cu an hawl nan an hmu thei nawn lo, magnet thawn khal an hawl nan zungbun hi a var a si ruangah a hip thei lo.
A fala neihawk a sawmnak cu a hlawhtling lo ih an tlungsal, zungbun dang a lei ih a thaisun ah an fehnak hmun kel ah an va fehsal ih neihawk a sawmsal. Tuiṭum ahcun a hlawhtling ih a fala khalin arak ‘aw’, hlawhtling zetin a fala ih kut ah zungbun cu a bunter.
Leave a Reply