A Fale 2 In An Thihsan, A Zunngai Hnemtu A Pasal Cu A Fale Thattu Arak Si

England, Lancashire khua ah nupa duhdawtaw zet an rak um fate 2 an nei, an fapa cu kum 1 le thla 8 mi a si ih an fanu cu ni 24 lawng ih upa a si. An neihawk hnuah innsang pabik Jordan (kum 30) ih mizia cu a danglam vivo, hnaṭuan a paih lo ih an innluah man khal a pe dah lo.

Lawngkasanak ah a lek ringring ruangah an nupa karlak ah buainak a suak ih ṭhenawk an tum, innsang nu Laura (kum 29) in a pasal cu ṭhen a tum ih ṭhenawk dan ding a tawlrel rero. Cutin an um laiah an fanu Ruby cu a thi, hringtu a pa in a itthat laiah puan in a nenthat. Asinan zohman in an thei lo, tualthattu khal lem a cang ih riahsia zet bangin aum.

An fanu vuinak caanserh pawl khal amahin a tawlrel thluh, an fanute in a thihsan ruangah innsang nu cu a riahsia tuk ih a pasal in a hnem. An fanute in a thihsan ruangah an nupa karlak ih buainak khal innsang nu in a theihhngilh lawk ih a pasal cu a thin hnemtu ah a cangsal. Thla 8 hnuah a pasal ih mizia cu a kel ah a cang, nitinten lawngkasanak ah a lek.

A nupi le a fapa khal a ngaihsak nawn lo ruangah Laura in a pasal cu ṭhen ngaingai a tum, a thaizing ah a pasal in an fapa Logan cu tualsung swimming pool ah a hruai ih cutawk ah an fapa cu a that. Ruahsur lakah Jordan in a fapa ruak cu a cawi ih itthat vekin aumter, a nupi hnenah a fapa cu a pe ih a itthatnak a rei zo, thangharh thlang aw’ a ti.

Amah cu zianghman thei lo bangin bizza lei dingin a poksuak hngal. Cutin an fapa Logan khal ziang natnak in a thi ti an thei lo ih an vuiliam, innsang pabik hi lemcan a thiam tuk ruangah zohman in an rinhlel lo. Fate an neih nawn lo ruangah Laura in a pasal cu ṭhen a tum nawn lo ih an umtlang ringring lawk.

A pasal ih mizia cu a tuar thei nawn lo ruangah an ṭhenaw fel. Cumi hnuah Jordan in fala dang anei ih thubuai aneih ruangah palik pawlin an kai, a sulhnu pawl an zingzoi vivo hnuah Laura thawn an fate 2 thattu khal amah a si ti an theisuak.

October 2019 ah thawnginn ihsin reilote sung an suah zalen lawk ih cutawk ah a fala thar Evie Adams (kum 23) cu a that ih mah le mah thataw vekin a umter. Asinan palik pawlin an zingzoi ih Jordan ih thatmi a si ti an theifiang. Jordan cu tualthat thubuai pathum, a fale 2 le a fala thar a that ruangah damsung thawngtla dingin a thu an ṭhencat.

A nupi hlun Laura in thilumdan a theih hnuah a fale 2 thattu kiangah zianghman thei loin thindaiten arak um ringring thei cu a thiamaw lo zet. Laura in, “A thiltuahmi hi minung ih thiltuah ding a si lo, hremnak ziangvek khal an pe asilen a phu lo, a tawk lo.

Ka tlansan ding a phang tuk ruangah ka fale 2 a that, ka fale 2 thahnak ihsin in control. Zianghman ka rak thei lo ruangah in control thei ngai, fate ka nei nawn lo ruangah amah lawng ka ṭul ding ti a theicia. Thil ziangkim ka rak theihthiam lo ruangah sual ka tiaw tuk, ka damsung ka thiamaw lo ding. Ka fale thlan ah ka feh ringring ih ka tuar hi a naa tuk” a ti.

Be the first to comment

Leave a Reply

Your email address will not be published.


*