A Fale 4 Cu Thihdaan An Orhter, Tuiṭum Thawngtla Pawl An Suah Tikah A Fale Pawl An Suah Ve Ding A Beisei Tuk, An Phone Ding Caan Arak Hngak Ringring

Yangon, South Dagon ih um Daw San San Aye ih fale 4 cu ralkap pawlin April 17 zing ah tualthat thubuai orhter in an kai. An vengsung ah palik that tong an um ruangah rinhlel thu in mino 11 an kai ih Daw San San Aye ih fale 4 khal an telve.

May 24, 2021 sun ah ralkap pawlin pukmah 302 orhter in a fale 4 cu thihdaan an orhter. Hringtu a nu cu umngaihnak thei loin a ṭap rero, a fale pawl hi tualthattu an si lo. Tualthatnak a thleng zan ah an vengsung an rak kil ruangah ralkap pawlin rinhlel thu in an kai.

Cumi hnuah Insein thawnginn ihsin South Dagon ramsung ih thawnginn ah an umter ruangah a nu in beiseinak thar anei. Tuiṭum ah Min Aung Hlaing in thawngtla tam zet a suah zalen ih Daw San San Aye in a fale pawl an suah zalen ding caan a hngak ringring nan an telve lo.

Daw San San Aye in “Thawngtla pawl an suah zalen ih ka fale pawl thuhla thei dingin ka hngak ringring. Kan hmunram sung thawnginn ah an ra umter zo ih ziangtik ah in run phone ding tin in phone ding caan ka rak hngak ringring. Thawngtla suak lakah an telve asilen ka lungawidan ding cu ka sim thiam lo ding.

Midang thawngtla pawl an suah zalen thluh ih an suah ve lo ruangah thawnginn sungah an beidong tuk pang ding ti ka phang. Zangfahten ka fale pawl hi suah lohli hram uh, nan suah lo asikhallen thubuai an orhmi tal cu thlengsak hram uh” a ti.

Be the first to comment

Leave a Reply

Your email address will not be published.


*