A Fanu Kum (3) Mi Pom In Tiva Ah A Dawp

Ralhrang in Myanmar ramsung thuneihnak an lak hnuah sumdawngnak phunphun a tlasia, hnaṭuan ding aum nawn lo. Mipi lakah harsatnak phunphun a thleng ruangah beidong in mah le mah that aw an um hnuaihni zo.

Bago ramkulh, Pyay khua ih um innsang nu kum 23 mi Mai Wai Tun in a fanu kum 3 mi Mah Hnin YaTi Muang cu a pom ih Irrawaddy tiva ah a dawp.

August 28, 2022 sun nazi 2:45 hrawngah lilawn parah ava feh ih lamzin kiltu palik pawlin thu an rak sut, a fanu a damlo ruangah siikhan a fehpi ding thu a sim thei ih palik pawlin an check-up lo. Lilawn kap ah a fanu te pom in a ding ringring lawk, palik pawlin an rinhlel deuh ruangah hlanral ihsin an zoh laitak ah tiva ah a dawp.

Furcaan a si ih ruahpi a tamtuk ruangah an fen hlo cih, a fanu ih ruak cu a lang lawk nan an va lak hlanah a pil hlo sal. Mai Wai Tun tei nufa hi Pyay khawpi, ahmat (12) lamzin ih um an si. Ziangruangah an that aw ti cu an theifiang hrih lo, bulpak thinharnak ruangah an that aw tin an ngan.

Tutiang an ruak hi an hmu hrih lo, mibawmtu pawlkom in ruahsur lakah an hawl rero lai. Khuami pakhat in, “An innsang pawl cu an thinhar tuk. A thatawk hlanah ‘ka thinhar tuk ih ka thi duh’ a ti ṭheu, asinan hivek thil a thleng ding ti cu an zum lo. An ruak cu tutiang kan hmu thei hrih lo ih kan hawl rero” a ti.

Be the first to comment

Leave a Reply

Your email address will not be published.


*