A Fanu Phun 10 Exam Tuah A Hngah Laiah Ralhrang In An Kap Ngah

Bago, Thekkala tlawnginn ah ralhrang kaihruainak in phun 10 exam an tuah. April 6, 2022 ah exam an tuah ih nupinu pakhat in a fanu exam tuah cu tlawnginn lenglam ihsin arak hngak.

Cutin, a fanu a hngah laitak ah tlawnginn kiltu ralhrang pawl cu meithal in an lek ih meithal an puak thutthi ih a ke ah an kap ngah. Tualsung mi pakhat in, “Zinglam nazi 10:45 ah an kap ngah, himi tlawnginn lawngah exam an tuah ih ralkap le palik pawlin an kil thepthep.

Ralhrang pawlin an kap hrim maw, an kap pang ti cu ka thei lo. A ke ah an kap ngah ih Thekkala siizung ah an tuamhlawm rero lai” a ti. Ralhrang pawl kaihruainak in rampum huap phun 10 exam an nei rero lai. Kum dang aiin exam tuahtu cu an mal sawn.

Kum dangah cun rampum huap phun 10 exam tuahtu cu ting 8 ihsin ting 9 karlak an si ringring, tuikum ahcun phun 10 exam tuahtu cu 280,000 hrawng lawng an si. NUG cozah in ralhrang kuthnuai ih phun 10 exam tuahmi cu an cohlang lo ding thu an suah.

Be the first to comment

Leave a Reply

Your email address will not be published.


*