A Fanu Tei Nupa Hrangah Nau A Paisak

Australia, Lilydale khawpi ih um nupa tuakkhat cu fa an nei thei lo. Kum 28 mi Meagan cu a suah ihsin nau’inn sul anei lo, a tleirawl laiah damlonak danglam zet anei ih a sunglam an zohdik cu a suah ihsin sul arak neilo ti an theisuak.

A duhdawtmi a tlangval thawn an neihawk hnuah sibawi thiamnak hmangin midang nau an paiter, midang sul an saan ih fanute an pai. Asinan vansiatnak an ton ih an nau paisaktu cu a thi, cumi hnuah Covid-19 in leitlun a nuai ciamco ih an naupai saktu ding an hawl thei nawn lo.

An thinhar in an beidong zet, Meagan ih nu kum 54 mi in a fanu tei nupa cu a zangfak tuk ih a fanu ih tuarnak cu a theihthiampi. Curuangah an nau paisak dingin pum a peaw, a kum a upa zo ruangah naupai thei nawn lo dingah an ruat lawk. Sibawi in a sul sunglam an zohdik ih nau na pai thei lai” an ti.

Sibawi pawlin a fanu tei nupa ih cii cu an la ih a sul sungah an ret, asinan veithum rori a nung lo ruangah an hlawhtling thei nawn lo dingah an ruataw. A nu in beidong lo dingin a cah ih a vei 4-nak an tuahsal cu an cii a nung, January 13, 2022 ah fapa duhnung zet an nei ih an innsang cu an hlim zet.

Innsang nubik in, “Ka fanu, ka bawm thei cu ka lungawi tuk, ka diriam tuk. Nau ka pailonak hi kum 20 lenglo a si zo ih nau ka rak pai thei lai cu ka lungawi tuk, a liamzo caan ah kirsal khalsehla ka fanu tei nupa hrangih ka thiltuahmi hi ka tuahsal thotho ding” a ti.

Be the first to comment

Leave a Reply

Your email address will not be published.


*