A Fapa In A Fanu A Pawngsual Ti A Thei Nan A Phuangsuak Lo

Singapore ramsung ih thilthleng hi a rapthlak zet, anmah humhimnak ah an hmin cu tarlang siang a si lo. Singapore nu kum 43 mi cu October 25, 2021 sun ah mai fanu rori humhim lo tin thubuai pahnih orhter a si.

2010 kum ah a fapa cu kum 13 mi a si ih a fanu cu kum 5 mi a si, a fapa cu online cartoon a zohnak ah nupa-sinak lam arak zoh ngah ṭheu ih a thinlung a fehsual (Nauhak pawl ih zuknung zohmi hi fimkhur a ṭul tuk). Cumi ṭum ah a farnu cu arak puahcok zo.

Innsang nu in a fanu ih bawngbite ah mipa tii a hmu ih a fapa hnenah “Na farnu hi na puahcok leh maw si, na pawngsual maw si?” tin a sut. Cutin a fale karlak ih thilthleng cu arak thei thok zo nan midang hnenah a sim lo, 2010-2017 kum sungih an innsang ih thilthleng cu arak thup ringring. A fapa cu kum 20 a kim ah a farnu cu arak pawngsual.

An innsang ih thilthleng cu palik pawlin an theisuak ih January 2020 kum ah a fapa cu nauhak kumkim lo pawngsual thubuai orhter in an kai, kum 11 le hrek sung thawngthlak le vei 7 vuak tuar dingin a thu an ṭhencat.

A nu khal a fanu cu a fapa lakah a kilhim lo ruangah le theicing khalin zianghman a tuah lo ruangah thubuai orhter a si ih November 15, 2021 ah thuṭhennak felfai an nei ding. Thiamlo coter asilen kum 4 sung thawngthlak le $4,000 zat kuanter a si ding, a fanu cu hmunhimnak ah an ret zo. (Source: WOB, The Straits Times)

Be the first to comment

Leave a Reply

Your email address will not be published.


*