A Fapa In A Zumnak Jesuh A Phatsan Duh Lo Ruangah Hringtu A Pa In A That

Africa, Uganda, Bupalama khua ih um tlangval kum 20 mi Tabiruka Tefiiro cu 2019 kum ah a piangthar, Islam innsang ih thanglian a si ih an sakhua biaknak tlansan in Christian ah a lut.

Hringtu a pa Kasimu Kawona in a theih veten an inn ihsin a dawisuak ih Kampala khua ah, hotel ah hnaṭuan in aum. A nu in an sakhua ih lutsal dingin a sawm ringring ih an runinn ih tlungsal dingin a sawm.

Kum 2 hnu August 2021 ah an inn ah a tlung, cutawk ah a pa arak um lo. Augsut 14 sun ah a pa khal an inn ah ava tlung ve ih a fapa cu an sakhua ah a lutsal ah a ruat, innsang meeting a ko ih a pa in an sakhua Islam ih a lutsal le lut lo thu a sut.

Tabiruka Tefiiro in “Kum 18 ka kim zo ih, kum ka kim zo ruangah ka duhmi sakhua ah ka um thei. Pathian duhdawtnak ruangah rundamnak ka co zo ih Christian ka zumnak cu ka phatsan thei nawn lo, hmailam caan khalah ka phatsan dah lo ding” a ti. A farnu in an innsang meeting-nak thuhla cu Morning Star News hnenah a sim thei.

A pa cu zianghman ṭong loin a suak ih hmun dangah aum, a thaizing August 15 ah a pa cu nam le phahlai kengin an inn ah ava tlungsal ih a fapa cu a vuak ciamco.

A fapa cu an innkiang tei inn sungah ava lut ih a pa in a dirsuak hnuah thingkung ah a tawnbet ih phahlai in a vuak ciamco hnuah zianghman a thei nawn lo. Cutin a fapa zianghman thei nawn lo cu hridai thawn thingkung parah a thlai ih a thi.

An innhnen le an khuatlang hruaitu Islam upa pawl khalin Kasimu Kawona cu an dem zet, tualsung Islam hruaitu upa pakhat in “Ka lau tuk, sakhuanak ruangih tualthat cu kan cohlang lo a si. A rapthlak tuk” an tiih palike sakhan ah an fehpi. Palik pawlin thubuai picang cu an orhter lo ih a fapa a that ruangah thubuai tenau lawng an orhter. (The Christian Post)

Be the first to comment

Leave a Reply

Your email address will not be published.


*