A Fapa Kum 2 Mi A Thatnak A San Cu ‘Vanram Ah A Kuat Lohli Duh’

UK, Parkwood Heights khawpi ih um innsang nu kum 31 mi Natalie ih thiltuah hi a rapthlak zet. Christian ah a lut pekte ih rawngbawlnak khalah a pe’aw nasa zet, a rawngbawlpi pawlin ‘nupi ṭhaṭhum a si’ ti an lawm rero. Asinan, a fehsual.

A innsang pawl cu khuasia pai ah a ruat thluh ih khuasia le vangcung mi a hmuh ṭheu thu khal a rel. An kawhhran hmin ih camping an tuahnak ah a telve, tlaikhat cu an hruaitu hnenah ‘baptism’ in pe hngal uh tin a dil ruangah aumdan cu mak an ti tuk.

Curuangah a thaizing ah a rualnu in a tlunpi, motor sung khalah amahten a ṭong rero ih motor dunglam ih to a fapa cu a zoh hnuah, “Ka fapa, ka lo duhdawt tuk” a ti rero. Motor mawngtu khalin aumdan a diklo ti a thei ih motor ihsin a dawp tla ding ti a phang zet.

Tluangten inn cu an thleng thei nan inn an thlen hnuah a fapa cu a that, takkolhnak tidai ah a fapa cu a hnim that. Palik pawlin Natalie cu an kai ih a phuangawknak ah, ‘Ka fapa cu ka innsang (khuasia) lak ihsin ka humhim a si, vanram ah ka kuat” a ti.

A nu hnen khalah, “Na hnen ihsin ka fapa ka humhim zo” a ti. A innsang pawl cu khuasia pai thluh ah a ruat ih an mit khal a tumtuk, an hmel khal a ṭihnung um tuk a ti. Thawnginn sungah rawl le tidai a in duh lo, ni 40 sung rawlul anei tum ih cumi hnuah ‘ka fapa hnenah ka feh ve ding’ a ti.

Curuangah palik pawlin thawnginn ihsin siizung ah an tuamhlawm, a thluak fehdan a diklo an ti. Cun, a thluak fehdan a diklo ruangah tualthat thubuai an orhter lo. A damṭhah hnu siizung ihsin a suah thei tikah inn lamah a tlung thei ding. A innsang pawl khalin an theithiam ih court ih thurelcat mi cu an lungkim, thawnginn sung um ding aiin amah hi tuamhlawm a ṭul sawn an ti.

Be the first to comment

Leave a Reply

Your email address will not be published.


*