A Fapa Neihsun An Ruksak, Bike Thawn Kum 24 Sung A Hawl Hnuah A Hmu

China ramah nauhak ruk hmang an tam zet, ṭhenkhat nauhak cu fa nei thei lo pawlin an lei ih an fa vekin an cawm thanglian. Ṭhenkhat asilen an taksa an zuarawk ter ih harsatnak phunphun an paltlang.

China, Liaocheng khuate ih um Guo Gangtang ih fapa neihsun cu 21 September 1997 ah an ruksak. A fapa cu kum 2 le hrek lawng a si lai, an inn hmaiih a lek rero lai cu nupa tuakkhat in an rak ru ih Henan khua ah an zuar ih fa nei theilo in an rak lei.

Hringtu a pa cu a riahsia tuk ih rawl khal a ei ṭhiṭha thei nawn lo, a fapa hloh hnu thlakhatnak ah a sam khal an var thluh ih a kg khal a tlaniam zukzo. 80kg ihsin 60kg ah a tla, palik pawl khalin an hawl rero nan an hmu thei lo.

Guo Gangtang cu beidong a tum lo ih an neih sumpai zaten kengin a fapa hlo hawl dingin a poksuak, a bike ah a fapa ih zuk a tar ih China ramsung hmun dangdang ah a hawl vivo.

Lamzin kap ah a fapa ih zuk a bet, mipi hnenah cahnah a zem. Sur le sa lak khalah a fapa cu a hawl vivo, a caan len lamzinkap le lilawn hnuai tikah a riak ṭheu. Sumpai a neih lo caan ahcun kutdawh in tla caan a hmang lawk.

Accident khal vei tampi a tong ih lamzin ah suamhmang khal a tong ṭheu nan a beidong cuang lo. Guo Gangtang ih thuhla cu mipi in an thei duehdeuh ih an zangfak tuk, amah sirhsan in 2015 kum ah Lost and Love timi zuknung an tuah ih a cangtu khal China milar hminthang Andy Lau a si.

Guo Gangtang in “Mi tampi in pacangṭha na si in ti ṭheu. Asinan, pacangṭha ka si lamlam lo, runtu neilo pacang ka si. Ka tonmi riahsiatnak ruangah hringnun hi a thok ihsin ka tansal ngam nawn lo. Curuangah ka fapa hlo hi ka hawl vivo ding” a ti.

Cutin a hawl vivo hnuah a fapa cu Central China’s Henan Province ah a hmu ih mitthli thawn an pomaw, China’s Ministry of Public Security in an thisen an test hnuah pafa ngai an si ti an nenhnget ih an fapa rutu nupa khal an kai zo. Love an Lost zuknung cangtu Andy Lau khalin lungawipinak ca a kuat. Hringtu a nu in “Ka fahniang, ara kirsal” tin mithli thawn an pomaw.

Be the first to comment

Leave a Reply

Your email address will not be published.


*