A Hmin An Sut Hnuah An Kap That

Shan State, Hsipaw Township, Nam Lan veng sungih um nunau kum 30 mi Nang Aye Kham cu October 1, 2021 simlam nazi 6:00 ah zo ti theih lo mipa pahnih in an kap that.

Vengsung mi pakhat in “Kan vengsung mi cu a si nan hmun dangih a umnak hi a rei zet zo. A nulepa ara pal duak ih innleng a suah laiah an kap that. Meithal keng pahnih in an thlun vivo a bang, a motor sung ihsin khal a suak hrih lo. Meithal keng pahnih in na hmin ziangso? tin an sut hnuah an kap that” a ti.

Nang Aye Kham ih hngawng le awm ah an kap ngah ih siizung ah an tlanpi nan an tuamhlawm rero laiah a hliamhma tuar loin a thi. Hsipaw ramsung ah hmin theih lo meithal keng an tam zet ih mi an kap that ṭheu ruangah khuasung mipi pawl cu vaksuak ṭhiṭha ngam loin an um.

Tualsung mi pakhat in “Ni a tlak hnu cun innleng kan suak ngam nawn lo, tulawngah asilo. Ahlan ihsin kan vaksuak ngam lo, meithal kengih mi kap that an tamtuk zo. Ahlan ihsin kan him nawn lo, ahlan ahcun mipa deuh lawng an kap that. Tu’ahcun nunau khal an kap that thlang ruangah kan thlaṭem tuk” a ti.

Tuiṭum ih an kah thatmi cu minung theihsual ih kap that an si tin kiangkap um pawlin an rel. “Kan theihdan cun minung diklo an kap that, an kah tummi asilo. An duh asilen an ral diktak kap ding an si, hivek ih theihfiang lomi an kap that cu tualsung mipi hrangah a thinnat um tuk” an ti.

Be the first to comment

Leave a Reply

Your email address will not be published.


*