A Hnaṭuan Cu Mithi An Um Tikah Ṭah A Si, A Ṭap Thiam Zet Ih A Ṭahnak Ihsin A Innsang Pawl A Cawm

Leitlun ah sumpai hawlnak phunphun aum. China, Henan Province ahcun mithi an um tikah ṭap thiam pawl an sawm ṭheu. Mithi cu an theih dah mi a si lo, an hmeltheih khal a si lo nan an sungkhat, ruapi ṭhabik vekin an ṭah ciamco thiam.

Mithi ruak kiangah zuungai zet vekin an um ih an ṭap ciamco, a caan len mithli thawn hla an sak phah ṭheu. Cutin, mithi innsang le an sungkhat pawl ih lunglai a kuai ih an rak ṭap ve. China ramah mithi ṭah thiam pawl an ruainak cu kum 2,000 lenglo a si zo ih an nunphung khalah a tel.

Mithi um tik ih ṭap thiam pawl cu an hnaṭuantu dingah an duh ringring lai. Kumkhat ah 200,000 yuan hrawng an ngah thei, mithi an um tam asilen an hnaṭuan a tam. Dingding Mao timi nu cu “top professional mourners” mithi ṭah thiam zet a si ih nazi hrek a ṭap asilen 300 yuan a ngah.

Mithi an um tikah an sawm ṭheu ih a hmeltheih lo mithi ruak kiangah lungkuai zetin a ṭap ciamco ṭheu, a ṭahnak ihsin a pasal le a fale pawl a cawm thei. A fale pawl cu khawpi lamah tlawng a kaiter thluh. Tu’ahcun mithi ṭah lawng si nawn loin lam khal a telh zo.

Taiwan ram ih um nunau kum 30 mi Liu Jun-Lin khal mithi ṭah thei zet a si ih a ṭahnak ihsin a innsang pawl a cawm. Africa, Ghana khawpi ih um ‘Coffin Dancers‘ pawl ih an hnaṭuan cu a danglam zet thung.

Mithi an um tikah an ṭap ve lo ih an lam ciamco sawn, “Suah ni ah kan lungawi ih thih ni khalah lungawi ding kan si” tin mithi um tikah mithi kuang cu an zawng ih an lampi vutvo. Mithi innsang pawl ih riahsiatnak a ziaum phah, hitin mithi um ih an lam tikah sumpai an ngah.

Be the first to comment

Leave a Reply

Your email address will not be published.


*