A Innsang Hnenah A Sakruang An Pe Duh Lo, A Nulepa In A Thi Ti Khal An Thei Hrih Lo

Mandalay fala kum 25 mi Thu Thu Zin cu ralkap cozah duh loin lamzawhnak ah a tel ṭheu. Covid-19 thlisia a hrang ruangah inn khalah umthiam loin damlo pawl a tuamhlawm, damlo pawl hrang oxygen buaipi in center lamah aum.

A nulepa hi an upa zet zo ih kum 60 an luan veve, an fanu cu an seherh thei tuk ruangah lamzawhnak ih a tel thuhla khal a sim dah lo. July 27 sun nazi 12:00 hrawngah lamzawhnak ah ava tel ih ralkap pawlin an rak kap ciamco.

Thu Thu Zin ih lu ah an kap ngah a hmun ah a thi cih. Midang pathum khal an kap ngah ih hliamhma nazet tuar in an kai, an kaihmi pawl ih thuhla cu tutiang an thei hrih lo.

Thu Thu Zin ih ruak cu ralkap pawlin an thiar, a thaisun ah a rualpi pawlin a ruak an va dil ih ralkap pawlin aum nawn lo ti lawng an rak sim, cumi hnuah July 27 zanlam ah ralkap pawlin a ruak cu an urkang cih ti an thei.

A rualpi in “Tutiang a nulepa hnenah kan sim ngam hrih lo, ralkap pawlin an kai ti lawng kan sim. An kai ti an theih veten hringtu a nu cu catbang loin a ṭap rero ih a talbuai, a thi ti kan sim ahcun a tuar thei lo ding” a ti.

Thu Thu Zin ih ruak an ngah lo nan a sungkhat le rualpi pawlin tuisun July 29 ah ruak um loin vuinak caanserh an hmang.

Be the first to comment

Leave a Reply

Your email address will not be published.


*