Africa, Burkina Faso khua ih um Martine cu Christian innsang ihsin thanglian a si. Zarhpisun ah an khawm ih an pastor in “Nan ral pawl hrangah thlacam uh” tin forhfialnak anei. Khawmtiak ah biakinn hmaiah thunuam rel in an umkhawm, cu laifang ah hriamkai Islamic pawlin an va siim.
An Bible le pulpit cu an lasuak ih biakinn hmaiah an urkang sak. Mipa zaten an ko ih biakinn dunglam ah an ding tlarter ih an kap that thluh. Martine ih pasal, a pa le a unau, a pasal ih nunau pawl khal an kap that thluh. Hriamkai pawlin an phone, ID card le an bike pawl an laksak, an lak thei lo mi cu an urkang.
Hriamkai pawlin,”Tlan lohli uh, nan ṭap asilen kan lo that thluh ding” tin an hringhro. Martine ih innsang zaten an thatsak thluh ih umnak ding anei nawn lo, Open Doors thawn hnaṭuan tlang pawlkom pakhat in Martine cu an kilkhawi.
Martine in, “Ka pa hi a zumnak ruangah that dingin an hringhro ṭheu. Khua ihsin suak dingin an fial nan Jesuh hmin ruangah ka tlan lo ding, Jesuh hmin ruangah thih khal a ṭih lo. Ka taksa an that thei nan ka thlarua cu an that thei lo ding a ti ṭheu.
Ka innsang thattu pawl cu ka ngaidam, ka innsang zaten thattu pawl cu Jesuh thei loin an thi pang ding ti ka phang. Pathian hnenah hitin thla ka cam, ka parah himi thilthleng na siang ih hngakawknak ding zohman ka nei nawn lo. Ka hringnun cu Na kut sungah ka hlan, Nangmah in in kilkhawi aw. Na hnen ihsin ka tlan lo ding, ka beiseinak umsun cu Nangmah lawng na si tin thlaza ka cam ṭheu” a ti.
Leave a Reply