A Mipi Pawl Ral Kut Ah Tlansan Sianglotu Ukraine President Hi A President Ṭuan Thokdan A Mak Zet

Ukraine ramsung buainak ruangah an ram president Volodymyr cu leitlun in pacangṭha / miralṭha tin cawimawinak an pe. US ram in an ram hi suahsan lohli dingin a fial ih a tlannak zalam tluan ah US ralkap pawlin an kil ding thu an sim thei nan arak duh lo.

Kum 44 mi Volodymyr in, “Ral kan do lai, tlan ka ṭullo ih cerek ka ṭul sawn. Kan zalennak hrangah ral kan do ding, kan zalennak hi mi kut sungah kan pe lo ding. Kan ram hrangah ral ka do ding” arak ti. Volodymyr hi January 25, 1978 kum ah a piang, a nulepa cu Jews miphun an si.

Law daan a zir hnuah buaih a ngah, asinan Law daan tualrawn sungah hna a ṭuansuak lo. Russia ṭong khal anmah vekin a thiam. Cumi hnuah zuknung khawvel sungah a lut ih a hlawhtling zet, zuknung sungah capohthiam in lem a can ṭheu.

TV shows le zuknung tampi ah a tel, 2015 le 2019 kum sungah zuknung sau pawl TV show ah lem a cang ih a hlawhtling tuk. A zuknung hmin cu ‘mipi riantu’ (Servant of the People) ti a si, himi zuknung a thok lamah tlawng saya a si.

An ram cozah ih eiruknak le diklonak pawl a pholang ih cumi hnuah an rampi president a ṭuan, zuknung sungah Ukraine president arak ṭuan. Zuknung an can ṭheh kum 2019 kum ah an rampi hrilawknak ah a tel ngaingai ih mipi in an duh tuk ruangah vote tampi hmu in nehnak a co. Zuknung sungah an ram president a ṭuan ih a takram khalah president a ṭuan vivo thei.

Be the first to comment

Leave a Reply

Your email address will not be published.


*