A Naunu A Hawl Rero Ih Hliamtuar Mipa Pakhat A Bawm Phah, Mipa Cu A Naunu Thattu Arak Si

Australia nu in a naunu a hawl rero ih lamzin kap ah hliamtuar mipa pakhat a hmu, a theitawk in a bawm. A thaizing ah cumi mipa cu a naunu thattu ti a thei. Nikum October 17, 2020 zan ah innsang rawlei khawmnak an nei, cutawk ah ṭongkam an el’aw deuh ih kum 32 mi Tammara Macrokanis cu inn ihsin a suak.

Zan nazi 9.30PM ah Chenai Radnedge in a naunu cu a seherh tuk ih ava hawl, lamzin kap ah mipa tlu a hmu. Motor kiangah arak it, Tammara Macrokanis in ava pannai ih lungfim dingin a bawm. Cun a naunu a hlo ih a hawl lai thu pawl a sim thei ih ‘na rak hmu pang maw?’ tin a sut nan mipa in zianghman a sim lo.

Cumi lamzin ah palik pawl an thleng ciamco ih Tammara Macrokanis cu an tlanter. A naunu cu a hawl hmu lo ih a tlung, a thaizing ah a nu in a kaitho ih tualsung thuthang TV a zohter. A hawl rero mi a naunu ih ruak cu lamzin kap ah an hmu, motor in napin a pah ngah ruangah a taksa khal hmunhnih ah a phel’aw.

A naunu ih ruak an hmuhnak hmun ah an va feh lohli, cutawk hmun cu a zan ih mipa hliamtuar arak bawmnak hmun a si ti a theisuak. Cun mipa ih motor khal lamzin kap ah arak um lai ih a motor hmailam cu thisen in a khat. Khami zan ah motor sia le motor parih thisen pawl arak hmu ngah lo cu a vanṭha sawn ah a ruat’aw.

“Motor parih minung thisen le taksa them pawl rak hmu sehla cun motor lamzin lakah ka tlanlut hngal ding” a ti. A naunu pah thattu Kaine Carter (kum 31) khal palik pawlin an kai, amah hi ritheihsii tham ṭheu a si ih himi zan khalah ritheihsii a ri tuk ruangah cansualnak tong a si.

Tammara Macrokanis ih feh lai cu napin a pah ngah ruangah a taksa khal hmunhnih rori ah a phel thei, a pah that hnuah mithi ruak cu a thiar ih lamzin kap hramrul lakah a hlon. Cutin ritheihsii a ri thawn a cau tuk ruangah a tlu ih Tammara Macrokanis in zianghman thei loin arak bawm mi a si.

Chenai Radnedge in, “Carter thluak sungah ziang thil aum ti ka thei duh, ka naunu a pah that ih a thawngtlak ding thawn a milaw lo tuk. Ka naunu nunnak ruat tikah a thawngtlak ding caan cu zianghman a si lo. Thawnginn sungah nikhat ah veithum rawl an pe ṭheu ih a vanṭha tuk” a ti. Kaine Carter cu ritheihsii ruangah mi pah that thubuai le a thiltuahmi parah ṭuanvo la loin a tlansan ruangah thubuai pahnih an orhter ih December 6, 2021 ah thuṭhennak felfai an nei ding.

Be the first to comment

Leave a Reply

Your email address will not be published.


*