A Neihsun A Pa Thi Zo Hrangah Hla A Sak Ih Lungzuur In A Ṭap

Thailand tleirawl kum 12 mi Chanadej Khiewsen hi a zangfah um tuk. Hringtu a pa thawn lawngin an khuasa, a pa cu caan reipi sung cancer nat in a damlo, tuamhlawmnak ding sumpai an neih lo ruangah lamzin kap ah hlasak in sumpai a hawl ṭheu.

Kum 5 mi a si lai ihsin lamzin kap ah hlasak in caan a hmang zo, a pa cu a bese vivo ih February 15 ah a thihsan. A pai ruak vuinak dingah sumpai a nei lo ruangah Facebook tualrawn ah live music tuah in sumpai a hawl, a hlasak laiah cun a supaw tento ih hlimhmel kengin a cangvai.

Live music a tuahnak san a rel laiah a supaw thei nawn lo ih a biang ah a mitthli a luang. Chanadej Khiewsen in, “Ka duhlo bikmi ni ara thleng, ka pa in pacang zet ih um dingin in cah. Ka pai hrangah a netabiknak himi hi ka tuahsak duh, ka pa hrangah live concert ka tuah.

Zangfahten ka pai ruak vuinak ding hrangah in bawm uh, himi hi ka tuah duh lo tuk nan lamzin dang ka nei lo” a ti. Online mipi pawlin an zangfah tuk ruangah bawmnak an pe ih a pai ruak cu ṭhaten a vuiliam thei ruangah neta ah lungawithu a simsal.

Chanadej Khiewsen in, “Nan zaten parah ka lungawi tuk, in seherhtu nan zaten parah lungawithu ka lo sim. Nan cakuatmi le comment mi pawl ka lo letsawng lohli man lo ruangah in ngaithiam hram uh, ka riah a sia tuk lai. Ka hringnun hrangah ka theitawkin hmailam ka pan vivo ding” tin a tarlang.

Be the first to comment

Leave a Reply

Your email address will not be published.


*