A Nu In A Aungbali Cahnah A Sop Darh Thluh, Aungbali A Poh Ngah Cu A Lungawi In A Beidong

Thailand, Surat Thani Province ih um fala Nisakorn in aungbali a poh ngah, asinan a aungbali in a nu in arak sop dard thluh ruangah a beidong zet. Surat Thani Province ah dawr a ong ih aungbali a lei.

A aungbali ticket cu a bawngbi sungah a pai, hringtu a nu in aungbali cahnah aum ti a theih lo ruangah arak sop cih ih aungbali cahnah cu a siatdarh thluh. August 1, 2022 sun ah aungbali poh ngahtu an phuang ih pakhatnak a poh ngah ti a thei.

Aungbali sumpai 16,000 baht lenglo a poh ngah nan ava laksuahnak ding cahnah cu a siat thluh. Ti ngaihnak a theih lo ruangah va lak khal a tum lo lawk ih Facebook cahmai ah a thilton cu a tarlang.

Nisakorn in, “Aungbali ka poh ngah nan ka aungbali cahnah cu kan rak sop darh thluh. Ziangtin ka tuah ding?” tin a tarlang. Mi ṭhenkhat in Government Lottery Office ah va feh awla, aungbali neitu na si ngai le ngai lo zohdiknak an rak lo nei hmaisa dingih sumpai cu na la thei ding’ an ti.

Government Lottery Office ahcun ava feh ih a aungbali cahnah sia khal a keng, ṭuanvo neitu pawlin an zingzoi hnuah aungbali poh ngahtu a si ngai tin an nenhnget hnuah sumpai cu kimcangten an pe.

Nisakorn in August 3 sun ah forhfialtu mipi pawl hnenah lungawithu a sim thei ih, “Atir ahcun ka feh tum lo. Mi tampi in feh dingin in fial ruangah ka san (try) sin ding tin ka va feh ih sumpai kimten ka ngah cu ka lungawi tuk” a ti.

Be the first to comment

Leave a Reply

Your email address will not be published.


*