A Nulepa In Bike An Leisak Lo Ruangah A That

Shan State, Panglong khua, ahmat (3) vengsung ih um tlangval pakhat cu ritheihsii a rit hnuah hringtu a nulepa a that. March 12 ah palik in tualsung mibawmtu pawl an sim thei hnuah mithi ruak cu an va la.

Panglong mibawmtu pawlkom ih ṭuanvo neitu in, “Palik pawlin thuhla in sim thei hnuah ruak kan va la. A pai ruak lawng kan la ngah, a pa cu nam in a sat that. A nui ruak cu kan la ngah hrih lo” a ti.

Nulepa thattu cu kum 26 mi tlangval a si ih palik pawlin an kai zo. A nu cu a that hnuah an hmuan sungah a phum ih an phorhsuak hrih lo, a pa cu a that hnuah an ihkhun hnuai ah a thup. Tualsung mi pakhat in, “Tlangval in a nu hnenah bike lei dingin a fial, a nu in a leisak thei lo ruangah a nulepa cu a that.

A nu in a sui pawl a zuar rero thu khal ka thei, bike an leisak thei lo ruangah ngamhuainak dingah ritheihsii a tham ih a nulepa cu a that” a ti. Tulai hi Panglong ramsung ah ritheihsii tham an tam zet, mipum 80 % in ritheihsii an ngawlvel zo.

Khuasung upa pakhat in, “Panglong ramsung ah ritheihsii tham an tam tuk. Ahlan hnakin an tam, tulai kan boruak thawn ṭih an nung tuk. Ei-in hawlnak khal a harsa tuk zo, hmailam caan ah tualthatnak, damiah taihnak pawl aum vivo ding ti kan phang tuk. Kan himnak dingah kan thinphang, Panglong ramsung ah fapa in hringtu nulepa that hi kan rak tong dah lo” a ti.

Be the first to comment

Leave a Reply

Your email address will not be published.


*