A Nupi Hlun Urthattu Cu Kum 20 Sung Thawngtla Dingin A Thu An Ṭhencat

2020 kum January thla ah Yangon, South Dagon ih um nupa tuakkhat cu an ṭhenaw ih an ṭhenawk hnuah innsang pa in a nupi hlun cu datsii in a tawih ih a urthat. Mi urthattu Soe Thura cu tualsung palik pawlin an kai hngal.

Kumhnih hnu April 8, 2022 ah thiamlo coter in kum 20 sung thawngtla dingin a thu an ṭhencat. Kum 23 mi Ma Lwin Mar Oo ih taksa 70% cu a kangsiat thluh ih siizung ah thlakhat zik te an tuamhlawm hnuah a hliamhma pawl tuar nawn loin a thi.

A tapa in, “An ṭhenaw fel zo nan ka naunu cu a pasal hlun in tongaw dingin a ko, ava tong ih ṭongkam an el’aw ciamco ‘ka lo urthat ding’ tin a hringhro. Motor sungih datsii ava la ih a urkang” a ti. Bago siizung ah an tuamhlawm hmaisa ih a hliamhma tuar a nasa tuk ruangah Yangon siizung ah an thawn sal, ni 20 sung an tuamhlawm hnuah a thi.

Ma Lwin Mar Oo ih pa in taza a cuai ih Soe Thura cu an kai. An thuhla cu kumhnih sung an buaipi hnu April 8 ah Yangon East District Court in ‘Kum 20 sung thawngtla dingin le hna harsa ṭuan dingin’ a thu a ṭhencat.

Ma Lwin Mar Oo ih tapa in, “A tir ahcun mi tuahmawh thubuai in taza kan cuai, ka naunu a thih hnuah tualthat thubuai pukmah 302 in taza kan cuai sal. Tu’ah kum 20 sung thawngtla dingin a thu an ṭhencat cu a mal tuk, ka farnu ih tuarnak pawl ruat tikah a milaw lo tuk.

Ka farnu cu a thih hlanah siizung ah naa tuar in a talbuai rero, a hliamhma tuar a nasa tuk. A taksa kang pawl an tuamhlawm rero laiah naa a ti tuk ih a aihram rero” a ti. Kum 2 sung rori an thuhla an cawlhsan lawknak cu Covid-19 thlisia a hrang ruangah an ti. Ma Lwin Mar Oo in fanu kum 6 mi a thihsan ih a pute hnenah aum.

Be the first to comment

Leave a Reply

Your email address will not be published.


*