A Nupi Hlun Urthattu Cu Thi Dingin A Thu An Ṭhencat

September 2020 ah China pacang in a nupi hlun cu gasoline in a tawih ih a urthat, kumkhat hnuah a thubuai cu court in a ṭhencat ih “Hremnak phunphun pek hnuah thi ding a si” tin a thuhla cu an ṭhencat rupri.

Kum 30 mi Amuchu cu online sungih milar pakhat a si, a online hmin cu Lamu ti a si. China, Sichuan Province, Aba tlang parah an um ih an khuasatdan cu online parah a pholang ṭheu. Tik Tok khalah follower 782,000 lenglo anei zo.

June 2020 ah a pasal Tang Lu thawn an ṭhenaw fel. An ṭhenawknak cu a pasal in kut a thlak ṭheu ruangah ti a si. Lamu cu a nulepa tei inn ah aum ih online parih live a thlah rero laitakah a pasal hlun in ava lutchilh ih a urkang.

A urkang lai khalah online mipi pawlin an rak hmu ve ih a rapthlak tuk an ti. A video cu thuneitu pawlin online par ihsin an hlonhlo zo, a taksa 90 percent cu a kangsia thluh, siizung ah zarhhnih sung an tuamhlawm hnuah a hliamhma pawl tuar nawn loin a thi cu online mipi pawl an thinheng zet.

An khuasung khalah lamzawhnak an nei. Cutin court in a pasal cu nungtlak ah an ruat lo ih thi dingin a thu an ṭhencat. All-China Women’s Federation in 2013 kum ih an zingzoinak ah China ramsung ah pasal nei lai nunau 4 sungah pakhat in hmuhsuamnak a tong ti an hmusuak.

Ṭhenkhat cu midang hnenah an theihter lo ih anmahten an tuar, thuneitu lamin nunau covo an ngaihsak lo ih an ngaihsak tikah cun khua an tlai zo ṭheu tin an ngankhum.

Be the first to comment

Leave a Reply

Your email address will not be published.


*