A Nupi In A Thihsan Hnuah A Fate 8 A Cawm Thanglian, Nupi Dang Neih Aiin A Fale Pawl A Ruat Thupi Sawn

China, Hung Yen Province, Vu Xa khua ih um pacang pakhat in a fale 8 cu harsa zetin a cawm thanglian ih zohthim tlak pacang ṭha tin tualsung thuthang sungah an tarlang. A nupi thawn kum 20 sung an neiaw ih fate 8 an nei, a nupi in an fate 9-nak ding a pai laiah nausiat in a thihsan.

Cutin innsang nubik um loin hringnun an hmang thok, innsang harsa zet an si ih Mr. Nguyen Van Hach cu a fale pawl ruat ah a thupten a ṭap ṭheu. A fale pawl hi mipa 6 le nunau 2 an si ih a nautabik cu kum 2 mi lawng a si lai, zan an itthat laiah a fapa nautabik in “Ka nu ka ngai tuk” tin a ṭap ṭheu ih Mr. Nguyen in a fapa cu mitthli thawn a hnem ṭheu.

Nauhak pawl an damlo caan khalah amah in a tuamhlawm thluh, a fale pawl hi an nauhak tuk lai ruangah hmun dangah hnaṭuan in a tlansan ngam lo ih an inn kiangkap ah lo hnaṭuan in a khuasa.

Vengsung mipi pawlin nupi dang nei dingin an forhfial ṭheu nan a fale pawlin nu-ei an tuar dingih, cun duh vekin a fale pawl a ngaihsak thei nawn lo ding ti a phang ruangah nupi dang nei cu a ruat dah lo ih a tum lo lawlaw. A fale pawl hi a hringnun ah a pakhatnak ah a ret, midang in a fale pawl cu la dingin an ra dil nan arak siang lo ih amahten a cawm thanglian thei ding thu a sim thei. A fale pawl khalin an duhdawt in an ngaina zet.

Mr. Nguyen Van in, “Fate cu Pathian thlasuah an si ih ka fale pawl cu keimah in ka kilkhawi ding an si. Kan fale pawl thawn kan hringnun hi a nuam zet” a ti.

Be the first to comment

Leave a Reply

Your email address will not be published.


*