Thailand, Samut Prakarn ih um innsang nu kum 44 mi Pattheema in a pasal a seherh, a duat tuk ruangah a itpi ṭheu dingah fala a ruai. An sumdawngnak ah an hlawhtling zet ih fate pakhat an nei zo, motor thawn sumdawng milian an si.
Pattheema hi a harhdamnak a ṭha lo ruangah a cau thei tuk, a pasal ih duhkhop a pe thei lo. Curuangah online parah hitin a tarlang. “Ka pasal hrangah nupi te ka hawl. Ka pasal hrangah nupi te pathum ka duh. Kum 30-35 karlak mi an si ding. High school ṭheh asilolen buaih pakhat khat ngah an si ding.
Thlakhat ah 15,000 baht an ngah dingih umnak le ei le in cu kan pe ding. Nunau pahnih in ka office hnaṭuan in bawm ṭheu ding, pakhat in ka pasal le ka fale pawl a kilkhawi ding.
Kan karlak ah buainak zianghman aum lo ding ti ka lo tiamcia, ka pasal in a duhduh a itpi thei ding. Caan bihkhiah aum lo ding, a duhduh a hruai thei ding. HIV nan nei le nei lo khal kan zohdik hmaisa ding” a ti. An thuhla cu online sungah thlipi bangin a hrang vutvo.
Mi ṭhenkhat in lar a duh ruangah hitin a tar men tin a phunphun an comment. Thailand media picang pawlin an va tong ih a thuhla cu an sutfiah. Pattheema in, “Ka thungai a si. Ka pasal hrangah nupi te ding ka ruai duh. Ka harhdamnak hi a ṭha nawn lo ruangah thinharnak ka nei, nitinten ithmut sii ka ei ringring a ṭul.
Nupi pangai vekin ka pasal hi ka kilkhawi thei lo, nupa-sinak khal kan hmanlonak a rei tuk zo, lar duh ruangih catar ka si lo, ka pasal bawmtu ding ka ṭul. Rualpi ding khal ka ṭul” a ti.
A pasal khal thu an sut ih, “Ka nupi in a thiltuah tum cu in sim thei ih ka lau tuk. Thungai thlak in thu kan rawn aw ih nupi te tivek neih ka duh lo nan ka nupi ih lungthlitum cu ka el thei lo” a ti. Phetchabun province ih um nunau kum 33 mi in hnaṭuan ava dil ih an cohlang, a pasal hrangah nupi te pakhat an hmu zo ih a dang pahnih an hawl rero lai.
Leave a Reply