A Pasal In A Thihsan Hnu Thla 14-nak Ah A Pasal Hrang Nau A Nei, A Pahnihnak Nau A Pai Tum

Tulai leitlun thiamnak hi a mak tuk. Mithi zo khalin nau an pai thei lai, an thih hlanah siibawi thiamnak hmangin an cii an lasuak ih sul sungah an ret.

US, Oklahoma khawpi ih um nupa tuakkhat cu fa neih an duh tuk nan an hlawhtling thei lo, curuangah an cii cu an lasuak ih siibawi thiamnak hmangin naupai an tum. Cutin an tawlrel rero laiah innsang pabik kum 41 mi Scott cu February 2020 ah lungphu cawl in a thi thutthi.

A thih hlanah a mipa cii hi veihnih an lasuak man. A thih hnuah a mipa cii cu a nupi sul sungah an ret ih nau a pai thei. May 2021 ah innsang nubik kum 41 mi Sarah in fapa a nei ih a hmin ah Hayes tin a sak.

Sarah hi tapa lakih thanglian a si ih unau neih a nuamzia a theifiang, curuangah a fapa khal unau nei dingin a tawlrel ih a pasal ih cii pakhat cu June 23, 2022 sun ah a sul sungah an ret ih a hlawhtling ding le hlawhtling lo ding ti theih a si hrih lo. Zarhhnih hnuah an theifiang ding.

Sarah in, “Ka pasal thawn kan duhmi bik cu fa neih hi a si. Ka pasal ih fa ka neih theinak dingah cun thil ziangkim ka tuah huam. Fa neih cu ka pasal ih lungthlitum a si ih vanram ihsin fa ka neih theinak dingah in bawm ding ti ka zum” a ti.

Be the first to comment

Leave a Reply

Your email address will not be published.


*