A Pasal In Kut A Thlak Ringring Ruangah Ṭhenaw Dingin An Tawlrel, Asinan Innsang Nu In, “Ka Ṭhen Thei Tlot Lo, A Hmelṭha Tuk” Tin A Ṭap Ciamco

China nupa tuakkhat cu kum 3 sung an neiaw zo ih a pasal in a nupi hi a vel ringring, kut a thlak ringring ruangah mipa sawn in ‘A cang thei nawn lo, kan umtlang ringring a si ahcun thil poi tla a thlengsual pang ding’ tin court ah ṭhenaw dingin thubuai ava thehlut. China Press thuthang in China ca in an tarlang ruangah an hmin cu kan tarlang lo men ding.

Kum 3 liamzo ah innsang nu hi kum 20 mi a si ih rualpi fehtlang in a pasal thawn an rak tongaw, thla 2 lawng an thlunaw ih an neiaw lohli. Asinan an neihawk hnuah ṭongkam an el’aw ringring ih mipa in kut a thlak, a vuaknak ah a taksa khal a vual thluh ṭheu. Asinan ṭhen hi a tum dah lo ih a cang zo cu cang ko seh tin a tuar men. A pasal in malte ngaithiam a dil asilen ziangkim an ṭha thluhsal lohli ṭheu.

Cuvek dinhmun an thleng ruangah mipa sawn in a cang thei lo ding tin ṭhenaw dingin thuthluknak a tuah. Court in ṭhenaw dingin a buaipi rero laiah innsang nu in, “A tel loin ka um thei lo, a hmelṭha tuk, a tuak tuk…” tin a ṭap ciamco.

A ṭhen theilonak cu thil pathum in a rel ih (1) “Ka first love a si ruangah ka ṭhen maimai thei lo, (2) Mipa ka duh hnuhnu cun dinhmun sia khalah siseh, dinhmun ṭha khalah siseh rinumten ka um ringring ding, ka tlansan dah lo ding tin thu ka ruatcat zo, (3) “A tuak tuk ih amah vek mipa tonsal ding cu a har tuk ding…” a ti.

Thu an sutnak ah a pasal cu an ramsung ih milar hminthang hlasakthiam Kris Wu ai khalin a mawi sawn’ a ti. A pasal in a ṭhen duhnak san cu a thiksia tuk ih tuar ci a si lo a ti, ziangtik lai caan khalah a pasal hi a rinhlel ringring ih a phone khal catbang loin a check sak. 24/7 in a pasal hi a kil ringring ruangah a pasal in har a ti tuk ih ṭhen a duh thu a sim thei.

Cun, innsang nu in nau a pai lai ih a pasal thawn innsang nuam zet ding a duh thu pawl a rel. Innsang nu in, “A duhmi ziangkim ka tuahsak thluh ding, in tlansan lo ding a si phot cun” a ti. Court khalin ti ngaihnak an thei hrih lo ih an thuhla cu an ṭhensak lo, innlam ah an tlungter sal ih anmahten thuhla reltlang hrih dingin an fial.

Be the first to comment

Leave a Reply

Your email address will not be published.


*