A Pasal Le A Fahniang Tanta In Ram Le Miphun Hrangah A Nunnak A Hlan

August 10 sun ah ralkap pawlin Yangon, Botahtaung Township, 44 lamzin kap ih um inndot number 38-nak ah mino pawl umhmun an khuar ti an thei ih an va check-up. Inndot par lamah an va kaiso ih Kaung Min Thant cu an kap tla, a rualpi 5 khal kutkai aw in an dawp ve cih ih an thi thluh.

Mithi lakah nunau pakhat a tel ih a hmin cu Ma Way Way Miang a si, a rualpi pawlin Panti (ပန်းသီး) tin an ko. Kum 29 mi a si ih fanu kum 5 mi a nei, a pasal cu haa sibawi a si, sumdawngnak an tuah ih an hlawhtling zet.

Ma Way Way Miang cu a tlawngkai lai ihsin cathiam thei, thudik cu relsuak hluahhlo pawl a si nan a thinlung cu a thiang zet. A rualnu in “Kan tlawngkai lai ihsin thudik lamtang a si, thudik a si ahcun saya/sayama pawl khal a ṭih lo ih a sual ngam” a ti.

Myanmar rambuai pekte ihsin lamzawhnak ah a tel ringring, phur zetin mino pawl hohatu a si. April thla khalah ralkap pawlin Kyauk Myaung ah mino 18 an kai ih Ma Panti khal a telve, an kaihmi pawl cu an hrem ih an vuak ciamco.

Cumi hnuah an kaihmi ṭhenkhat cu an suahsal ih Ma Panti khal an suah ve. Cutin, duhphorhnak ah a tel vivo ih August 10 ahcun a pasal le a fanu tanta in ralkap kut sungih um aicun tin a rualpi pawl thawn inndot par ihsin an dawt that.

An ruak khal lak an siang lo ih ralkap pawlin an phum tum. A pasal khal lungkuai in a ṭap rero. Myanmar cangan thiam hminthang Ko Khat Zaw in “A hlawhtling mi sumdawngnak, innsang nuam zet pawl cu ram le miphun ruangah a fehsan.

Riahsia zetin upatnak ka lo pe, neta ah thlapau dothlennak thuhla kan rel tinten zianghman si ve lo kannih pawlin ka unu (Ma Panti) le pasalṭha pawl ih nan thuhla cu kan run rel ringring ding, upatnak kan lo pe ding” tin a tarlang.

Be the first to comment

Leave a Reply

Your email address will not be published.


*