A Pasal Thi Zo Ih ‘Aw’ Ngai Dingin Leihnuai Tlangleng Cawlhhmun Ah Va Feh Ṭheu, A Thuanthu Hi Lungkuai Um !!!

UK pitar kum 71 mi Margaret hi a lainat um zet. A duhdawtnak mi a pasal ih aw ngai dingin nitinten Embarkment London Underground leihnuai tlangleng cawlhhmun ah ava feh ṭheu.

A pasal Oswald hi lemcan thiam a si, 1950 kum ihsin a ‘aw’ mawi zet cu leihnuai tlangleng cawlhhmun ih thuphuannak ah an hmang. Tlangleng pakhat a thleng ding asilen, “Zangfahten, lamzin ah rak um hlah uh” tin mipi pawl ralrinnak simtu ah a aw hi an hmang.

Kum reipi sung an kopawk hnu July 15, 2007 ah a pasal in kum 86 mi siin a thihsan. A pasal in a thihsan hnuah a pasal ih aw mawi zet ngai dingin leihnuai tlenglang cawlhhmun ahcun ava feh ringring, sunnivu in a to ih a pasal ih aw “Zangfahten, lamzin ah rak um hlah uh” timi cu a ngai ringring.

Kum 9 hnuah ṭuanvo neitu pawlin a pasal ih aw cu an hmang nawn lo ih midang aw an hmang. Margaret cu a pasal ih aw thei dingin ava fehsal ih a pasal ih aw a si nawn lo ruangah a mangbang tuk, ṭuanvo neitu pawl hnenah ava suthlam ih “digital system pawl kan thleng danglam thluh, aw khummi khal kan thleng thluh” an rak ti ruangah Margaret cu a riahsia tuk.

Ṭuanvo neitu pawlin a pasal ih awkhummi cu inn lam ih ngai dingah pakhat an pe, Margaret ih thuhla cu cozah hnaṭuantu pawlin an thei ih an zangfah tuk ruangah Embarkment leihnuai tlangleng cawlhhmun ahcun a pasal ih awkhum mi hi an hmang sal.

Hmun dang tlangleng cawlhmun ahcun awkhummi dang an hmang thluh nan tuini tiang Embarkment leihnuai tlangleng cawlhhmun ahcun Oswald ih aw an hmang lai. Margaret khal a pasal duhtak ih aw ngai dingin nitinten leihnuai tlangleng cawlhhmun ahcun ava feh ringring.

Be the first to comment

Leave a Reply

Your email address will not be published.


*