A Pasal Thi Zo In A Paisa Thuhnak A Sim Thei

Philippines putar Manuel timi cu mi taima zet a si ih nga vulh in a innsang pawl a cawm, a nupi Pampanga thawn fate 11 an nei ih an fale pawl cu an nauhak zet lai. Manuel in a hnaṭuannak ihsin P1 million man lawng pakhat a lei hnuah inn ṭha zet a sak, asinan Manuel hi a damlo phahphah ṭheu.

A damlo laiah a fale hnenah a lukham sung le a kor sungah sumpai P300,000 a ret ṭha thu a sim thei hnuah heart-attack in a thi. A sumpai thuhmi P300,000 cu a thlan tuahnak ah an hmang, innsang pabik a thih hnu ihsin an harsa vivo. Pampanga in a pasal hi a mang ah a hmu ṭheu.

An fale pawl hi an nauhak zet lai ih tlawngkai lai an si ruangah sumpai lakluhnak an nei nawn lo. Cutin Manuel ih ro thilri pawl cu an zuar vivo, an nuntu khuasatdan a harsat ruangah an inn hi zuar an tum.

Asinan mithi khua ih um an pabik Manuel in an innpi an zuar tum cu a siang lo a si dingin a nupi ih mang ah ara lang ih an hmunchar ih thilsia retnak innte khi va thiatbal thluh uh tin a fial. Pampanga in a fale pawl hnenah an hmunchar ih inn te cu thiatbal dingin a fial nan a fale pawlin innthar a si tin an thiatbal duh lo lawk, Pampanga in a fial ringring ruangah an thiatbal sal.

Cutin an thiatbal ih a zialphah pawl an dirsuak laiah thirkuang tumpi an hmu, a sung an vun zoh cu palang tam zet sungah sumpai an hmu. Sumpai cu an siar ih an ram paisa P3 million rori arak um.

Innsang nubik Pampanga in sumpai a hmuh veten a ṭap ciamco hngal ih, “Ziangruangah hitin sumpai na rak khawl ṭha, na damlo laiah siizung ah rak piahaw sawn ding na si nan” tin a pasal mual liam zo cu a ṭah. Manuel cu a damlo laiah pacang zetin arak um ih siizung piahawk khal a duh lo.

Manuel in sumpai cu a fale hnenah a zem, a fale pakhat ah P100,000 ciar a pe ih a dang cu bank ah a ret ṭha. Philippines mipi in, “Mithi khua ihsin khal a innsang pawl a seherh ih an harsatnak pawl a sutkian sak” an ti.

Be the first to comment

Leave a Reply

Your email address will not be published.


*