A Poi! Mizoram, Sesawm Ah Ramtawi Pakhat Cu An Kap That Sual

Mizoram, Lunglei District, Sesawm khua ih um pacang kum 69 mi Pu PC Zoliana cu January 20, 2022 simlam ah sapel in ram a tawi ih an khuami pakhat ramtawi in sa ah ruatin a kap that sual. Pu Zoliana hi United Penticostal Church (NEI) ah Kawhhran upa ṭuanlai a si.

An cansualnak hi an khua kiang Sesih ramlak ah a si. A taksa sungah cerek mu a lut tam zet ruangah a kaptu in musep (SG) meithal a hmang ti a lang. Upa Zoliana kap pangtu cu an khua ah zualko dingin a tlan hngal ih a thiamaw lo tuk ruangah har a ti zet ih a ṭongsuak lohli thei lo.

A kap pangtu in poi a ti tuk ruangah thinlung lamah harsatnak a ton phah ih tuini tiang an be thitha thei hrih lo ruangah an cansual caan khal an sutfiah thei hrih lo, an cansual caan hi an zumdan cun simlam nazi 4:30 hrawng si dingin an zum. Pu Zoliana hi pa tum zet a si ih feet 5 le inches 10 in a sang, a kap pangtu in a cawi thei lo ruangah khaw lamah zualko dingin a tlan thu a sim thei.

Lusun innsang lam in Pathian hmin in an ngaidam ruangah a kaptu ih hmin khal tarlang lo dingin media hnenah an ngen. Pu Zoliana ih fapa reldan vek asilen ramvak tlang an si lo nan an ramvah caan hi a bangaw, simlam khawthim zik zawn a si ih ramlak ah Pu Zoliana kap pangtu in ramsa ah ruatin a kap sual tin Mizo Special Report ah an tarlang.

Be the first to comment

Leave a Reply

Your email address will not be published.


*