A Rualnu Naupai Lai A Thik Ruangah A That, A Pum A At’tlek Ih Naute A Ruksak

Brazil nunau kum 27 mi ih thiltuah hi a rapthlak tuk, August 27, 2020 ih thilthleng a si ih tulawng ah court in thuṭhennak felfai anei, tualthattu cu kum 57 sung thawngtla dingin a thu an ṭhencat.

A rualnu Flavia Godinho Mafra (kum 24) cu naupai lai a si ih a naupai cu zarh 36 a kim zo. Flavia Godinho hi tlawng sayama ṭuanlai a si ih a nau neih ding caan cu an hngakhlap zet. Tualthattu Rozalba Maria Grime khal pasal nei lai a si ih a pasal cu hmun dangah hnaṭuan in aum ṭheu, naupai a duh tuk ruangah a pasal cu a bum ih naupai vekin aum.

A rualnu naupai cu minung umlonak hmun ah a hruaisuak ih tlakrawh in a lu ah a sut ciamco, cutin nam hriam zetin a pum cu a at’tlek ih a pum sungih naute cu a phorhsuak. Amah cu siizung ah ava tlan hngal ih a pasal hnenah nau anei thu a sim thei, siizung ih hnaṭuantu pawlin hitin nau nei lohli cu an rak zum ruangah palik pawl an ko.

Palik in thildik lo aum ding ti an zum ruangah nazi 15 sung thu an sut hnuah a thiltuahmi rapthlak zet cu a phuangsuak, a rualnu ih ruak a thuhnak hmun khal a sim thei. A rualnu hi a pum a at’tlek laiah a thi le thi lo khal theih a hrih lo, a ruak an zohdiknak ahcun a thisen a suak tamtuk ruangah a hnukcat ti an thei.

Rozalba Maria Grime in hi thil a tuah hlanah pum sungih um naute phorhsuahdan arak zir rero zo ih naupai lai ih damlo dan le nau neih lai ih an umdan pawl cu arak zircia thluh ti an thei. A pasal khal hi tualthatnak ah a tel le tello an zingzoi rero lai, a pasal cun zianghman a theihpi lo thu a sim.

Be the first to comment

Leave a Reply

Your email address will not be published.


*