A Taksa In Tidai A Hua, A Taksa In Tidai A Dai Ngah Asilen Naa A Ti Tuk

US, Tucson ih um tleirawl kum 15 mi Abigail in damlonak danglam zet anei, kum 3 sung a tuar zo ih siibawi pawl khalin an tuamhlawm dam thei hrih lo.

A taksa in tidai a hua, tidai khal a in thei lo ih energy drinks le theiti lawng a in ṭheu. Tak khal a kolh thei lo, a mitthli a tlak tikah a hmai hi a sen thluh ih naa a ti tuk. Tidai a in asilen a sunglam a naa ciamco ih a tuar thei lo.

Abigail in, “Kum 3 liamzo ah ruahsur lakah ka um ih naa ka ti tuk, acid lakih um vek ka si. Ka nu hnenah ruahsur in mi a tlak ngah tikah a naa maw si? tin ka sut ih ‘naa lo’ a ti. Cumi ihsin ka taksa in tidai a hua ti kan theisuak” a ti.

Siizung ah an piahaw ih siibawi pawl khalin a natnak hi an thei lo, a tuamhlawm damnak dingah caan reipi a ṭul lai ding ti an zum. Abigail in, “Ka mitthli khal ka taksa in a ngaih lo, meisa vek a si. Tidai ka in tikah ka taksa sunglam a naa tuk ruangah ka let thei, tidai ka in lonak cu kumkhat a si zo” a ti.

Hringtu a pa in a seherh tuk ih, “A tuar aiah keimah in tuar thei sehla ka duh. Damlonak dang a nei pang ding ti kan phang tuk, harsa zetin a tuar tento thei cu a pacang tuk” a ti. Tak a kolh tik khalah siivai a ei ta ih tidai malte lawng in tak a kolh, naa tuar phahin tak a kolh ṭheu.