A Taksa Pianphung A Tuah Danglam Thluh Ruangah Hnaṭuannak A Ngah Thei Lo Thu A Rel

France tlangval kum 34 mi Anthony in a taksa pianphung cu a tuah danglam thluh. Kum 9 sung a tuah danglam zo, Black Alien bang a tum ruangah a taksa pianphuang cu a tuah danglam ih tattoos in a suai aw khat thluh.

“Black Alien bannak dingah 34% lawng ka tuah aw lai” a ti. A cal ah ṭitsa a ben ih a mit’mu sung khalah tattoos a suai. A hnar le a hna khal a hlon, a lei hi a at phel. A serh khal a phel tum lai. A kutzung pahnih a sat tan. Hitin a taksa pianphuang a tuah danglam ruangah “hnaṭuannak ka ngah thei lo” a ti.

Anthony in, “Mi pangai te ka si nan mi tampi in in theithiam lo. Miaa ka si lo. Mi tampi in in ṭih, lamzin ah putar pawl ka hmu asilen in ṭih ding ka phang ruangah lamzin ka pial ṭheu. Nuahak lak khalah ka fimkhur zet. Ruahnak diklo a tamtuk ruangah hnaṭuannak ka ngah thei lo” a ti.

Anthony hi a nu thawn lawngin an khuasa. Mipi in ‘na nu in a lo hmuh tinten a mang sia ding’ an ti. Kan dung Mother’s Day’ ah Anthony in, “Ka nu, in hmuh tinten na mang a siat lo thu hi sim hai aw. In hmuh tinten a hni siamsi sawn. Ka hlawhtlinnak pakhat cu ka nu in ka parah thuṭhennak a tuah dah lo’ a ti.

Be the first to comment

Leave a Reply

Your email address will not be published.


*