A Thih Hnuah Mipi In A Lungthlitum Vekin A Innsang Hrang Inn An Sak Sak

Tlangval kum 20 mi Zin Lin Htet cu February 28, 2021 ah lamzawhnak ah a tel ih ralkap pawlin an kap that, a mit takah an kap ngah ih a thi. Ralkap pawl ih an kah that hmaisa lam a si ih leitlun mipi pawl khalin an rak thei ih an tuarpi zet.

Feb.27 sun ah “UN cangvai dingin Myanmar mipi paziat an thih a ṭul” tin a facebook cahmai ah a tarlang ih a thaisun ah an kap that.

A duhdawtmi a fala khal lungkuai in a ṭap rero, Zin Lin Htet cu innsang harsa zet ih thanglian a si ih a nulepa cawmtu a si, a lungthlitum cu a innsang hrang innsak sak a si.

A lungthlitum lam feh loin ram hrangah a nunnak a hlan sawn, mipi in an lainat tuk ruangah a thih hnuah a innsang hrang inn an rung saksak. Hmun dangdang ihsin bawmnak khal an pe.

Zin Lin Htet topinak ah Myanmar Chin Thalai Tlawmngai Pawl khalin ting 21 an pe ve. Ṭuanvo neitu pakhat in “Kan nau Zin Lin Htet ih lungthlitum vekin a innsang hrang inn kan sak sak, kan nau Zin Lin Htet cu van ah lungawi aipuang in um hram seh” tin a tarlang. Online mipi in “Na rauthla talin nan runinn te rung fang sal aw” an ti.

Be the first to comment

Leave a Reply

Your email address will not be published.


*