A Upa A Hawl Rero Ih Kum 24 Hnuah An Tongaw, A Upa In Nam In A Dawt

Italy pacang kum 35 mi Martin Rabanser in a upa hlo cu a hawl rero. Hringtu an pa in a thihsan hnu ihsin a upa Ivo (kum 42) cu inn ihsin a tlansuak. 1997 kum ah hringtu an pa in a thihsan ih Ivo cu hmun dangah a tlanhlo, a naupa in kum 24 sung arak hawl rero. Mihlo thuhla tin TV phunphun khalah a langter ṭheu nan an hmu thei lo.

Martin Rabanser cu nupi fanau nei in a khuasa. Kum 24 hnuah a upa Ivo cu an inn sungah ava lut thup ih a naupa itthat lai cu nam in a dawt ciamco, a nupi ih mit ah pepper spray a kap. A naupa ih nupi cu a tlansuak thei ih palik pawl a ko. Martin Rabanser cu hliam nazet tuar in amah tuahmawhtu cu zo a si ti khal a thei lo.

Martin in “Zoso na si? Ziangso na duh?” tin a sut ih Ivo in “Na u ka si, in theithiam nawn lo maw” arak ti. Palik pawl an va thleng lohli ih Ivo cu an kai, a naupa khal hliam nazet a tuar ih siizung ah an tuamhlawm rero lai. A cuap ah nam in a dawt ngah ruangah a dinhmun cu a ṭha lo.

An thubuai zingzoitu lawyer in “Ivo ih thinhennak cu a pai ro zemnak thuhla ruangah a si. Rothil thuhla ruangah a lungawi lo, a naupa ih umnak inn le thil dangdang ah lungawi lonak anei. Ro thuhla ih buai pawl cu lawyer in an cinfel sak ṭheu, annih cu sanhnih sung ah an cinfel lo ih tuahmawh awknak a thleng” a ti.

Ivo in “Ka naupa parah ka thinheng tuk nan that cu ka tum lo” a ti. Ivo cu inn ihsin a tlan hnuah hmun dangdang ah um ih tualsung library sungah caan a hmang ṭheu. An khua ih a tlunnak hi a rei zet zo nan an khua kiang ramlak ah aum ih a naupa ih cangvaihdan cu arak zoh thup ringring, cutin caan remcang a ngah laitak ah an inn ah ava lut thup ih nam in a dawt. Ivo thuhla ah palik pawlin “Cuap ih mi dawt cu mithat tum thubuai vekin kan fehter” an ti, an thuhla cu buaipi vivo ding a si.

Be the first to comment

Leave a Reply

Your email address will not be published.


*