AA In “Kawl Ralkap Kan Do Ngam Lo Asilo NLD Fasawn CRPH Kan Zum Lo Sawn…” A Ti

Myanmar ramsung buainak ah Rakhine ram hi daiten an um lai, AA ralbawi Htun Myait Naing in an ramsung ah CDM le lamzawhnak neih a ṭullo arak ti zo. Mipi cozah NUG ih sawmnak khal arak cohlang lo ih tumtahmi dang kan nei lai an ti.

Cun, June 1 ihsin an ramsung nauhak pawl cu tlawng an kai hluahhlo, an ram fimthiamnak hotu Dr. Tun Tun Thein in “Tlawng ong ni June 1 ah nauhak tlawngkai 358,931 zat an um, 100% percent zikte tlawng an kai” a ti.

AA in “Kawl miphun tam sawn ih kaihruaimi NLD ih fasawn CRPH in 2008 daanhrampi an thiatbal ih an urkang thu an phuang zo. Asinan, a ngaingai in an thiatbal cuang lo, nan relmi le nan tuahmi cu a dang.

2008 daanhrampi nan thiatbal ngai asilen ziangruangah mipi ih an rinsanbik mi Aung San Suu Kyi & Dr. Sasa cu president ah nan hril lo. 2008 daanhrampi in ramdang mi nupi pasal nei le tlangpar mi pawl president ṭuan dingih arak khamnak cu a nung lai ti a theihthei.

Daw Suu cu a tar zo ih Kawl miphun lakah president ṭuantu ding mitling nan um nawn lo ti nan theihawk ruangah Daw Suu cu U Than Shwe vekin lal dinhmin nan pe.

NLD party sung khalah president si thei dingih tlangparmi mifim mithiam tampi an um nan Kawl miphun lawng president an ṭuan ding timi lungput nan neih lai ruangah U Win Myint nan hril. Ramdang pawlin CRPH le NUG an zum thei lo vekin Rakhine pawl khalin kan lo zum thei lo.

AA in ralkap pawl an do ngam lo in ti, nanmah sawn in 2008 daanhrampi nan thiatbal ngam ngaingai lo sawn a si. Min Aung Hlaing a sung hnu khalah NLD ih ralkap PDF pawlin Rakhine ram nan ra la tum ding ti kan theicia, cumi hrang tu ihsin kan rak ralring cia zo. Himi ruangah nannih Kawl ramhruaitu pawl ih ramkheldan cu Rakhine pawlin kan lo zum thei nawn lo” a ti. (# Khualpu Gualnam)

Be the first to comment

Leave a Reply

Your email address will not be published.


*