Africa Zuhmun Ah Mino 22 An Thi, Exam Ṭheh Lawmnak An Tuah Ih Thihnak A Thleng

South Africa, East London khua ih rawldawr Enyobeni sungah tualsung mino 22 cu thicia in an va hmu. Tlawng exam ṭheh lawmnak an tuah ih zuhmun ah party an nei, mino lakih nauhak bik cu kum 13 mi a si ih upabik cu kum 20 mi a si.

June 26 zinglam nazi 4:00 hrawngah an va zohdik ih an rak thi thluh. An nulepa le vengsung mipi pawl cu an thinheng tuk ih zudawr cu khar hngal dingin an au ciamco. An thihnak san cu an theifiang hrih lo, tursia ruangah an thi si ding ti an zum.

An taksa parah hliamhma zianghman aum lo, siibawi pawlin an thihnak san hi an zingzoi rero lai. Zu phunphun an in tamtuk ruangah an thih phah a si ding titu khal an um. Tualsung mi pakhat in, “An taksa parah hliamhma zianghman aum lo. An thihnak san hi kan theifiang hrih lo. Tursia ruangah a si men thei, siibawi pawlin an phuang cing ding” a ti.

Vengsung upa pakhat in, “Himi zudawr hi a hminthang zet, mino pawlin an pan ṭheu. Nauhak tete khal zu in an siang ruangah vengsung mipi pawlin zudawr hi khar dingin an nor rero lai. Ṭhenkhat mino cu zial ah an thi, ṭhenkhat cu tokham le cabuai parah thicia in an va hmu” a ti.

Be the first to comment

Leave a Reply

Your email address will not be published.


*