An Ṭhenawk Hnuah An Nu In An Inn Zuar A Tum Ih Arak Urkang

England, Kennford ih nupa tuakhat cu buainak neuhneuh an neih ruangah an ṭhenaw. Kum 20 sung an rak umtlangnak inn cu an nu Hillary in a zuar tum ih a man cu ‘Kan ṭhenaw ding’ a ti.

Kum 75 mi John McCorry in an inn zuar ih a man ṭhenawk ding cu a lungkim lo, curuangah June 17 zanah a urkang. A urkang hnuah an tual ah a to ih zu in phah in an innkang hluahhlo cu a zoh men, runsuaktu pawl a ko lo ruangah a kang sia zet.

Venghnen pawlin runsuaktu pawl an rak ko ih inndang a kangkai hlanah an mit man. John McCorry khal thubuai an orhter ih thiamlo a co asilen thawng a tla thei.

John McCorry in “Ka urkang hrim a si lo ih zu ka innak ah ka cangsual ih a kang pang. Ka beidong tuk ruangah ziang tuah ding ti khal ka thei lo ih ka rak zoh men” a ti.

An nu Hillary in “Ka ṭhen ruangah a thinhar tuk ih zu a in ringring. Ka tlansan ruangah a thinheng tuk ih inn a urkang a si ding” a ti.

Court hmaiah John McCorry in “Ṭhenawk ka duh lo, ṭhenawknak ding lamzin khal ka hawl dah lo. Hillary in ziangkim a cemter, ka thinheng lo. Asinan ka beidong tuk” a ti. A nupi cu kirsal a tum nawn lo ih hmun dangah aum, an inn man cu £550,000 zat a si nan a kangsiat ruangah cuziat in an zuar thei nawn lo ding.

Be the first to comment

Leave a Reply

Your email address will not be published.


*