An Fapa Ih Nupi Cu An Fanu Hlo Ti An Theisuak

March 31, 2021 sunah China, Suzhou khua ah mopuai hlunghlai zet an nei, mopa le monu innsang pawl khal an tel thluh. Cutin kutsihnak an neih laitak ah mopa ih nu in an mo ih kut ah hminsinnak (birthmark) a hmu thutthi ih mak a ti tuk.

Monu cu a zoh ringring ruangah monu khal a lai thei, cutin monu ih nulepa a ko ih ‘Nan fanu ngai a si maw, nan falak mi ha a si?” tin a sut cu monu ih nulepa in mak an ti tuk. An falak mi ti zoi hnen hman ah an relsuak dah lo ruangah mak an ti tuk.

Thilumdan an simfiang aw ih an falak mi a si thu an sim, kum 20 liamzo ah lamzinkap ah nauhak hlo an hmu ih an fa vekin an cawm thu an sim.

Mopa nu khalin kum 20 liamzo ah an fanu a hlo ih an hawl rero nan an hmu thei nawn lo thu a sim thei ih an zohfiah cu an fanu ngai a si ti an theisuak. Monu khal a ṭap ciamco hngal ih lungawi aipuang zetin a nulepa ngai thawn an pomaw.

Monu in “pasal ka neih ding aiin ka nulepa ngai thawn kan tongaw sal cu ka lungawi tuk” a ti. Cun, amai ṭapa thawn an rak neiaw zikte thu khal a rel, asinan khuanui samhrisih tiah unau ngai an rak si cuang lo. Mopa cu an fapa ngai a si lo ih an falak mi a si, an fanu a hloh hnu ihsin an fanu an ngai tuk ruangah midang fa an rak lak thu an phuangaw.

Be the first to comment

Leave a Reply

Your email address will not be published.


*