An Fapa Tei Nupa Taza An Cuai, Tu Neih An Duh Tuk Nan Fa An Nei Lo Ruangah Taza An Cuai

India ram hi pilepu thawn innkhat ih umtlang khawm ṭheu an si, ṭhenkhat an thangthar nonal pawl cu anmahten inndang an tlei. India pacang kum 61 mi le a nupi kum 57 mi in an fapa neihsun le a nupi cu taza an cuai.

An fapa cu an duat zet, US ram ah vanzam mawng an zirter hnuah India ah a tlung ih vanzam mawng hna a ṭuan. 2016 kum ah nupi a nei ih a nulepa in five-star hotel ah kutsihnak an tuahsak. Honeymoon khal Thailand ram ah hmang dingin an fehter.

An fapa hrangah 25million rupees an hmang cem zo. An fapa nupi neihnak ah motor mankhung pawl Audi £63,000 man an leisak. An fapa ih nupi neihnak cu kum 6 a kim zo nan fa an nei hrih lo, fa nei thlang dingin an va forhfial ṭheu nan an rak ngaihsak lo.

Curuangah an fapa tei nupa cu taza an cuai ih zangnadawmnak ah £500,000 lenglo an dil, 25million zat cu an fapa hrangih an rak hmang cemmi zat a si ih a dang 25million cu an hringnun a siatsuah ruangah an ti.

Hringtu a pa in, “Kan sunmang pawl an thi thluh. Nulepa zaten ih sunmang cu tu hmel hmuh hi a si. Pilepu si dingin kum reipi sung kan hngak zo nan kan hlawhsam, fa nei lohli dingin kan forhfial ṭheu nan in ngaihsak lo. Kan lungkuai tuk, tu hmel hmuh man loin kan thi ding. Kum 6 sung an neiaw zo nan tutiang fa neih an tum hrih lo, tu hmel kan hmuh ahcun kan thinharnak pawl kan tuarthiam ding” a ti.

An fapa hi nupi a neih hnuah a nulepa kiangah an um lo, a nulepa cu an pahnih lawngin an khuasa ih an umhar thei tuk. Tu hmel an hmuh lo ruangah an khuaruahnak khal a siat. Court in an thubuai thehlutmi cu a cohlang ih May 17, 2022 ah a ko ding, an fapa tei nupa khal an ko ding.

Be the first to comment

Leave a Reply

Your email address will not be published.


*