Bago, Thayarwaddy, Thonse khua ih hnenum hnaṭuan kum 19 mi Ma Kyu Kyu Lwin cu a pilepu ih kuthlaknak ruangah a nunnak a liam. Veng lal in palik hnenah a sim thei nan thubuai zianghman an orhter lo, sumpai thawn a lem thluh.
U Thein Soe le Daw Kyu Kyu Myint tei inn ih hnenum hnaṭuan a si. August 11 zan ah a thi ih a thaizing ah zohman theih loin an urkang tum, an innkawt ih um veng lal in palik sakhan ah mithi an um tin ava sim thei.
Vengsung mi pakhat in, “Nithum lamcia ihsin a ṭap thawm kan thei, an vuakvelhnak thawm kan thei. Atir ahcun zohman theih loin mithi ruak hi an hloralter tum. Vengsung mipi pawlin an rinhlel ruangah palik sakhan ah an sim thei” a ti.
Innsang pabik U Thein Soe hi cozah hnaṭuan upa le ralbawi pawl thawn an kom aw ṭheu. Mithi ruak cu siizung ah zohdiknak nei dingin an phur, mithi ruak a thleng hlanah U Thein Soe cu siizung ah arak thleng hmaisa. Siibawi hnenah sumpai a pe ih siibawi in an zohdik hnuah rinhlel ding zianghman aum lo. A taksa ruhcang pawl khal a kim thluh tin a ngankhum.
An hnenum Ma Kyu Kyu Lwin cu Thayarwaddy peng, khuate pakhat ih um a si. A naunu pahnih thawn U Thein Soe le Daw Kyu Kyu Myint tei inn ah hnenum hna an ṭuan, nulepa an nei nawn lo. Hnenum hna an ṭuannak cu kum reipi a si zo. U Thein Soe tei nupi in kut an thlak ṭheu.
U Thein Soe in ralhrang pawl hnenah sumpai a pe ih thubuai zianghman tuahsak loin mithi ruak cu an urkang ruangah vengsung mipi pawl cu an lungawi lo zet.
Ma Kyu Kyu Lwin ih naunu pahnih khal thu an sut nan U Thein Soe tei nupa in an kaa hupsaknak ah thilri an pe ih an pu tei nupa an ṭih ruangah thudik an phuangsuak ngam lo. An unu ih a thihnak san cu nunau natnak in a thi an ti. Vengsung mipi ih an reldan ah Ma Kyu Kyu Lwin hi nau a pai, pawngsual ih naupai a si thei’ an ti.
Leave a Reply