An Innkang Hluahhlo Hmaiah Pathian Thuthangṭha A Sim Ih Hni Siamsiten Lungawithu A Sim

US, South Carolina ih um rawngbawltu ropi pakhat ih inn cu a kang hluahhlo, meitat pawlin het leh chet tin an phelhmit rero laiah ani cun Facebook parah Live arak thlah ih Pathian thuthangṭha a ausuak. Sammy Smith hi hmun dangdang ah feh in rawngbawlnak anei ṭheu, Grace Cathedral Ministries dintu khal a si.

An inn hi an sak ṭhehnak a rei hrih lo, an inn a kaannak cu meisa hri fehsual ruangah si an zum. Cutin an inn a kang hluahhlo laiah Sammy Smith in, “Live ih nan hmuh vekin kan inn cu a kang rero lai. Kan inn kan sak ṭhehnak hi kum 4 lawng a si lai, khitin kangmei in a nuai ciamco.

Asinan kangmei lak ihsin Pathian in in rak humhim ruangah ka lungawi tuk. Pathian ih lairelnak ihsin zohman kan pial thei lo, a caan ahcun Pathian ih laireldan hi kan theithiam lo ṭheu. Zoh uh, kan venghnen pawl khalin in duhdawtnak an langter, firefighters pawl khal khi an fel tuk.

Kan ruatdan vekin thil a feh lo asikhallen kan pomthiam hi a thupi tuk, thil ziangkim a ṭhasal leh mai ding. Kangmei lak ihsin in humhimtu Pathian hmin cu thangṭha in um ko seh, thlacamnak thawn in rak bawm uh law” a ti.

An kawhhram member pakhat in, “Kan riahsia ding caan a si nan kangmei lak ihsin Pathian in a humhim ti kan theih ruangah kan lungawi sal” a ti. Sammy Smith cu hni siamsiten meitat le vengsung mipi pawl hnenah lungawithu a sim thei, vengsung mipi pawl khalin bawmnak an pe.

Be the first to comment

Leave a Reply

Your email address will not be published.


*