An Kaih Mi Ralhrang Pawlin An Pu Ralbawi Ih Sualzia An Rel, ‘Nunau A Hmuh Mi Cu A Sualpi Vivo, PDF Nunau Pawl Hotu Khal A Sualpi’ An Ti

Ralhrang 361st Battalion hotu hi mihur zet a si. An kaihmi nunau pawl cu a sualpi vivo, PDF nunau pawl hruaitu khal an kai ih a sualpi thu a kuthnuai ralhrang pawlin PDF hnenah an sim thei.

Sagaing, Ye Oo ramsung ih ralhrang 4 cu sakhan ihsin an tlansuak ih August 20 sun ah tualsung PDF pawlin an kai. An kaih mi ralhrang 4 cu Kalaymyo hranbun ih um an si nan helicopter in an phur ih Mingin ramsung ah an thlah.

Mingin le Ye Oo ramsung ah an vakkual vivo ih khua pawl an urkang, nunau an kaih mi pawl cu an pu in a sualpi vivo. An pule pawlin sualnak a phunphun tuah dingin an fial, an hringhro. An hmuhmi thil rapthlak zetzet ruangah an tuar thei nawn lo ih an tlansuak thu pawl PDF hnenah an sim thei.

An umnak ramsung ah internet aum lo ruangah an thuhla cu August 25 sun lawng ah an tarlang thei thu PDF hruaitu in media hnenah a sim thei. An kaih mi ralkap pakhat in, “kan pu hmin cu Major Kyaw Naing a si. Taungoo khuami a si, DSA ah training kaisuak a si.

Kan thlennak khua tinkim ah a hmuhmi nunau cu a sualpi vivo. PDF nunau pawl kaihruaitu nunau upa pakhat khal kan kai ih Thazin Chaung khua ah a pawngsual” a ti. An kaih mi ralkap 4 cu kum nauhak tete lai an si, PDF in ṭha zetin an kilkhawi.

PDF hruaitu in, “Ralhrang pawlin an pu ih hremnak, hringhronak le hmuhsuamnak pawl an tuar thei nawn lo ruangah an tlansuak. Ralbawi pawlin an kutsung ih um ralkap khal nasa zetin an hmuhsuam, an hringhro. Mipi parah cun rapthlak zetin an cangvai, an hmuhmi nunau cu rualban lo tiang in an sualpi” a ti.

Be the first to comment

Leave a Reply

Your email address will not be published.


*