An Khua Ah Mipa An Um Lo, Fala Pawl An Lengtar Vivo

Brazil thlanglam ih khua pakhat ah mipa an um mumal lo, an khua hmin cu Noiva do Cordeiro a si. 2014 kum ih an hminsin vek asilen an khua ah nunau 600 hrawng an um ih kum 20-50 mi rual an si. Nunau pawl cu an ruangrai a ṭha in an hmuihmel a mawi ruangah an khua khal a hminthan phah.

An khua ah mipa an um thei lo. An khua hi nunau lalnak khua a si, ziangkim ah nunau in thu an nei thluh. Mipa an va um ding asilen nunau kuthnuai ih an um a ṭul, innsangsang cangvaihnak rawlsuang, hnipuan sop tipawl khal mipa lawnglawng in an tuah thluh a ṭul.

Nunau lalnak khua a si ruangah mipa an um rei thei dah lo. Ṭhenkhat cu pasal nei an um nan khua dangah hna an ṭuanter ih zarhte le zarhpi lawng ah an khua ah an tlung thei. Nunau pawl cu an lungrual thei zet ih an thil neihmi khal an hlawmaw vualvo ṭheu.

Kum 49 mi Rosalee Fernandes in “Mipa aiin nunau in thil tampi kan tuah thei sawn, kan khua khal a nuam sawn ih kan lungrual thei tuk. Kan khua sungah buainak aum asilen nunau lawngin thu kan ṭhen thei” a ti. Kum 23 mi Nelma Fernandes in “Mipa ka hnam lonak cu a rei tuk zo, ngaihzawng nei ih pasal nei cu kan ruat ve ṭheu.

Asinan hmun dangah pasal nei in kan khua suahsan ding cu kan duh lo, kan khua ah mipa an ra um ding asilen kan kuthnuai ih an um a ṭul” a ti. Rosalee Fernandes in “Kan thinlung sungah Pathian aum, biakinn feh le puithiam hmai ih pasal neih tivek a ṭul lo. Nauhak pawl baptise pek khal a ṭullo, hipawl cu mipa pawl ih tuahmi daan men a si” a ti.

Be the first to comment

Leave a Reply

Your email address will not be published.


*