An Naute A Hlo Ih A Lungaa Lawk, Kum 10 Hnuah A Fapa Aiawh Dingah Nauhak A La Ih A Fapa Ngai Arak Si

Romania ramah nupa tuakhat duhdawt zet an rak um ih fapa te an nei. An fapa neihsun cu kum 3 mi a si ih a hmin cu Bernardo a si, nikhat cu a nu in tlawng ava thlah ih a sun ah arak hlo. Simlam ah an fapa cu an va hmuak ih arak um nawn lo ruangah an mangbang tuk, palik le khawtlang ṭuanvo neitu pawlin het leh chet tin an hawl rero nan a sulhnu hmuh ding um loin a hlo.

Hringtu a nu Gabriela Suarez cu lungkuai in a ṭap ciamco ih a lungaa lawk, an fapa cu a hlo lo ara tlungsal ding a ti ringring. An fapa te a hloh ruangah an nupa karlakah boruak a ṭha thei nawn lo, buainak phunphun a thleng ih an ṭhenaw phah. Gabriela Suarez in an fapa cu a hlo lo, ara tlungsal ding tin khua le ram a cuan ringring.

An fapa zunngai in aum ruangah a damlo, an innhmai ah nauhak pawl tlawnginn lam pan ih an feh lai a hmuh tinten a biang ah mitthli a luang ih ‘Tuvek caan ah ziangtin ka fapa te aum ding’ ti lawnglawng a ruat. A damlo bese vivo ruangah siikhan ah ava feh ṭheu, sibawi nu in, “Na damlonak hi na taksa a si lo ih na thinlung sawn a si. Na fapa aiawh ah nauhak dang cawm dingin la awla na lunglennak pawl a lo hnem thei ding. Na damlonak khal a ziaum ding ka zum” tin ruahnak a pe.

Kum 10 hnuah cun nauhak cawm dingin thuthluknak a tuah ih hngakṭah runinn ah ava feh, hmun dangdang ah a fehkual vivo nan a thinlung latu nauhak a hmu thei lo. Hmun pakhat ih a fehnak ah mipa nauhak kum 13/14 mi hrawng a hmu ih a zoh ringring, nauhak te cu midang vekin a lek ve loin amahten toin zuk arak suai rero.

Gabriela Suarez in hngakṭah runinn ṭuanvo neitu hnenah a thuhla a sutfiah ih ṭuanvo neitu in, “A nauhak laiah lamzin kap ah an rak hlonmi a si, a hmin cu Tomas a si ih nauhak dang lakah a lek ve dah lo. Khitin amahten aum ringring men” a ti. Nauhakte kiangah Gabriela Suarez cu ava feh ih a hmin a sut hnuah a zuksuai tla a bawm ih an komaw.

Gabriela Suarez cu a tlungsal ih a zan ihsin a thinlung sungah nauhak Tomas cu a cam ringring. Curuangah a fapa si dingin ava hruai ih thilṭulmi pawl a tuahfel thluh, Tomas a lak hnu ihsin a fapa ngainak khal nikhat hnu nikhat a ziaum ih a harhdamnak khal a ṭhah phah vivo.

Gabriela Suarez in Tomas umdan cu a zoh thup ṭheu ih amah thawn pehtlaih awknak neicia vekin a theiaw ruangah mak a ti zet. Nikhat cu Tomas in zuk a suai ih Gabriela in, “Ziang zuk so na suai?” tin ava sut, Tomas in, “Ka nu zuk a si, ka nu cu maw a lungawi tikah a hni ciamco. Asinan a thaisun ah a thinheng tuk lala” a ti.

Gabriela in Tomas ih hringtu nu cu a zingzoi duh ruangah a thisen DNA a la ih siizung ah ava zohdik. A thisen cu amai thisen thawn arak milawk ruangah an mangbang tuk, thil dangdang an zingzoi vivo hnuah amai fapa rori a si ti an theifiang. Cun, Tomas rak rutu nunau pakhat khal tualsung palik pawlin an kai ngah.

Tomas rutu nunau cu rittheihsii le zu ngawlvel a si ih fapa arak nei ve nan motor accident in a thi ruangah midang fa a ruk thu a phuangaw, cun a kilkhawi paih nawn lo ruangah lamzin kap ih a hlo thu pawl cu palik hnenah a sim thei. Gabriela cu a fapa ngai thawn an tonawk sal ruangah a lungawi tuk ah a ṭap, cun a fapa hmin khal ahlan ih a hmin Bernardo tin a thleng sal. A pasal thawn an umtlang nawn lo nan an fapa ruangah an tongaw phahphah ṭheu ih nuam zetin hringnun an hmang rero lai.

Be the first to comment

Leave a Reply

Your email address will not be published.


*