Thailand, Tha Li district ih um tlangval kum 29 mi in nupi anei ih a thaizing ah a nupi cu mo’man thawn a tlanhlo. A nupi cu nuthlawi note a si ih fapa pakhat anei zo, a nupi hi Laotian miphung a si. A nupi kum 23 mi thawn an theihawknak cu ni 10 lawng a si lai.
Monu ih nu le a pate cu an neiaw ih an neihawknak hi kum 2 a rei zo, a pate in a khihhmuh ih an hmeltheih aw. Tlangval kum 29 mi cu fala nei dah lo a si, a innsang pawlin nupi nei dingin an fial ringring.
A fala thar in neiaw lohli dingin a ngen, an neiaw asilen a nu kiangah a um ve thei ding a tiih a duhdawt thu khal a sim thei. Curuangah May 18, 2022 sun ah neiaw dingin an tawlrel. May 18 sun ah hlunghlai zetin an neiaw ih an sungkhat pawlin an lawmpi, mo’man ah 36,000 baht a pe.
An neihawk zan ah an karlakah a nupi thar in a fapa kum 5 mi cu a itter, a fapa cu a itthat hnuah mipa in a vun kuah ih nupa-sinak hmang dingin a sawm nan arak duh lo. “Zingpit ah thil poimawh zet tuah ding ka nei, ka fapa tla tlawng ka thlah a ṭul. Zandang ah kan hmang leh ding” arak tiih an itthat.
A thaizing ah a nupi le a nu in Nakhon Phanom province ah hnipuan bungrua pawl kan va la ding an ti, ni 2/3 hrawng an cam a ṭul ding thu an sim thei. Mo’man pawl khal an kengtel thluh, cun a nu in a pasal (mopa ih pate) ih sumpai le ro thilri khal arak ruksak ve.
Cutin an nufa in an tlanhlo, mopa in a nupi thar le a nu cu a phone rero nan phone an kai thei nawn lo. An pehtlaih thei nawn lo.
Mopa in, “Ka nupi thar ih nu in ka pate ih thilri bungrua pawl khal a ruksak ve. Nuthlawi in in bum ngah, asinan ka duhdawt tuk lai. Ni 3 sung caanṭha ka pe ding, nithum sungah ara kirsal asilen ka cohlang ding” a ti.
Leave a Reply